ലഖ്‌നൗ: ബി.ജെ.പിക്കെതിരേ ശക്തമായ പ്രതിരോധം തീര്‍ക്കാന്‍ മുന്‍ വിശ്വഹിന്ദു പരിഷത്ത് നേതാവ് പ്രവീണ്‍ തൊഗാഡിയ രാഷ്ട്രീയ പാര്‍ട്ടി രൂപീകരിക്കുന്നു. അടുത്ത ലോക്‌സഭാ തെരഞ്ഞെടുപ്പിന് മുന്‍പ് പാര്‍ട്ടി പ്രഖ്യാപനം നടത്തുമെന്നാണ് അദ്ദേഹം ഇന്നലെ അറിയിച്ചത്.
രാജ്യത്തെ ജനങ്ങള്‍ വഞ്ചിച്ച പാര്‍ട്ടിയാണ് ബി.ജെ.പി. അയോധ്യ വിഷയത്തില്‍ ജനങ്ങളെ സംഘടിപ്പിക്കുകയും അധികാരത്തില്‍ എത്തിയ ശേഷം അവരെ വഞ്ചിക്കുകയുമാണ് ബി.ജെ.പി ചെയ്തതെന്നും തൊഗാഡിയ കുറ്റപ്പെടുത്തുന്നു.
പുതിയ പാര്‍ട്ടി പ്രഖ്യാപനം ഡല്‍ഹിയില്‍ വച്ച് നടത്തുമെന്നും അദ്ദേഹം പറഞ്ഞു. വിശ്വഹിന്ദു പരിഷത്ത് നേതാവായിരുന്ന തൊഗാഡിയയെ ആസൂത്രിതമായിട്ടായിരുന്നു മോദി-അമിത്ഷാ കൂട്ടുകെട്ട് പുറത്താക്കിയത്. ഇതേ തുടര്‍ന്ന് ഇവര്‍ക്കെതിരേ ശക്തമായ പ്രതിഷേധവുമാണ് തൊഗാഡിയയുടെ ഭാഗത്തുനിന്നുണ്ടാകുന്നത്.