ന്യൂഡല്‍ഹി: റെയില്‍വേ സ്റ്റേഷനുകളില്‍ ടിക്കറ്റിനായുള്ള നീണ്ട കാത്തിരിപ്പിന് വിരാമമാകുന്നു. റിസര്‍വ് ടിക്കറ്റിനെന്നപോലെ റിസര്‍വ് ചെയ്യാത്ത ടിക്കറ്റുകളും ഓണ്‍ലൈന്‍ വഴിയാക്കാന്‍ റെയില്‍വേ തീരുമാനം. അടുത്ത മാസം ഒന്നുമുതല്‍ ഇത് രാജ്യവ്യാപകമായി നിലവില്‍ വരും. ഏതാണ്ട് നാല് വര്‍ഷക്കാലമായി ഇത് നടപ്പില്‍ വരുത്താന്‍ ശ്രമിച്ചുകൊണ്ടിരിക്കുകയായിരുന്നു. എന്നാല്‍, ഇത് പലപ്പോഴും പരാജയപ്പെടുകയായിരുന്നു. തുടര്‍ന്ന് ഇത് മുംബൈയില്‍ മാത്രം പരീക്ഷിക്കുകയായിരുന്നു.
ട്രെയിന്‍ യാത്രക്കാരില്‍ കൂടുതല്‍ അണ്‍റിസര്‍വ്ഡ് ക്ലാസുകളില്‍ യാത്ര ചെയ്യുന്നവരാണ്. അതുകൊണ്ടാണ് യാത്രക്കാരുടെ സൗകര്യത്തിനായി ഇത് രാജ്യവ്യാപകമാക്കുന്നത്. മൊബൈല്‍ ആപ്പ് വഴിയും ഓണ്‍ലൈന്‍ വഴിയും ടിക്കറ്റുകള്‍ വാങ്ങിക്കാം. ഇത് റെയില്‍വേ സ്റ്റേഷനുകളിലെ തിരക്ക് പരമാവധി കുറക്കാന്‍ സഹായിക്കും.