കൃഷ്ണഗിരി: അണ്ടര്‍ 16 വിജയ് മര്‍ച്ചന്റ് ട്രോഫി ദേശീയ ക്രിക്കറ്റ് ടൂര്‍ണമെന്റില്‍ കേരള- ആന്ധ്ര മത്സരം സമനിലയില്‍ കലാശിച്ചു. മൂന്നാം ദിനം ആന്ധ്രയുടെ ഒന്നാം ഇന്നിങ്‌സ് സ്‌കോറായ 396 റണ്‍സ് പിന്തുടര്‍ന്ന കേരളം 249ന് ഓള്‍ ഔട്ടാകുകയായിരുന്നു. തുടര്‍ന്ന് ആന്ധ്ര രണ്ടാം ഇന്നിങ്‌സ് ആരംഭിച്ചെങ്കിലും അഞ്ച് ഓവര്‍ മാത്രമാണ് കളി നടന്നത്. ഇതോടെ ഒന്നാം ഇന്നിങ്‌സ് ലീഡിന്റെ പിന്‍ബലത്തില്‍ ആന്ധ്രക്ക് മൂന്ന് പോയിന്റായി. ഒരു പോയിന്റാണ് കേരളത്തിനുള്ളത്.
ഇന്നലെ ബാറ്റിങ് തുടര്‍ന്ന കേരളത്തിന് സ്‌കോര്‍ 62ല്‍ നില്‍ക്കെ 20 റണ്‍സെടുത്ത ക്യാപ്റ്റന്‍ വരുണ്‍ നായനാരുടെ വിക്കറ്റും നഷ്ടമായി. പിന്നാലെ അഭി ബിജു റണ്‍ ഔട്ടാകുക കൂടി ചെയ്തതോടെ കേരളത്തിന്റെ നില കൂടുതല്‍ പരുങ്ങലിലായി. തുടര്‍ന്ന് രോഹന്‍ നായര്‍(59), നിരഞ്ജന്‍ വി. ദേവ്(77) എന്നിവര്‍ അര്‍ധ സെഞ്ചുറിയുമായി നിലയുറപ്പിച്ചെങ്കിലും സ്‌കോര്‍ 215ല്‍ നില്‍ക്കെ രോഹനും 227ല്‍ നിരഞ്ജനും വിക്കറ്റിന് മുന്നില്‍ കുടുങ്ങി. വാലറ്റത്തിന് കാര്യമായി ഒന്നും ചെയ്യാനാകാതായതോടെ കേരളത്തിന്റെ ഒന്നാം ഇന്നിങ്‌സ് 249ല്‍ അവസാനിച്ചു. ആന്ധ്രക്കായി ശ്രീകര്‍ മൂന്നും, എം. ദീപക്, എ. കിരണ്‍ എന്നിവര്‍ രണ്ടും, ഹേമന്ത് റെഡ്ഡി, എസ്. അഖില്‍ എന്നിവര്‍ ഓരോ വിക്കറ്റും നേടി. ഈ മാസം 27ന് തമിഴ്‌നാടുമായാണ് ടൂര്‍ണമെന്റില്‍ കേരളത്തിന്റെ മത്സരം. തിരുനെല്‍വേലി ഐ.സി.എല്‍ ശങ്കര്‍ നഗര്‍ ക്രിക്കറ്റ് ഗ്രൗണ്ടിലാണ് കളി.