റിയോ ഡി ജനീറോ: ഷൂട്ടിങ് ലോകകപ്പില്‍ ഇന്ത്യയുടെ അഭിഷേക് വര്‍മയ്ക്ക് സ്വര്‍ണം. 10 മീറ്റര്‍ എയര്‍ പിസ്റ്റളില്‍ 244.2 പോയിന്റോടെയാണ് താരം സ്വര്‍ണം നേടിയത്. ഈ ഇനത്തില്‍ ഇന്ത്യയുടെ വണ്ടര്‍ ബോയ് സൗരഭ് ചൗധരി വെങ്കലംകൊണ്ട് തൃപ്തിപ്പെട്ടു. തുര്‍ക്കിയുടെ ഇസ്മായില്‍ ഖലസിനാണ് വെള്ളി. ഇന്ത്യയുടെ ഇരു താരങ്ങളും നേരത്തേ തന്നെ ഒളിംപിക് ക്വാട്ട നേടിയിരുന്നു.
ഇതോടെ രണ്ട് സ്വര്‍ണവും ഒരു വെള്ളിയും ഒരു വെങ്കലവുമായി ലോകകപ്പിലെ മെഡല്‍ പട്ടികയില്‍ ഇന്ത്യ മുന്നിലെത്തി.
നേരത്തേ ആദ്യദിനം കൗമാര വനിതാ താരം ഇളവനില്‍ വാളറിവനിലൂടെ ഇന്ത്യ സ്വര്‍ണം നേടിയിരുന്നു. രണ്ടാം ദിനം 50 മീറ്റര്‍ റൈഫിള്‍ ത്രി പൊസിഷനില്‍ വെള്ളി നേടി സഞ്ജീവ് രജ്പുത് ഇന്ത്യയുടെ മെഡല്‍ നേട്ടം ഉയര്‍ത്തുകയും ഇതിലൂടെ ഒളിംപിക് യോഗ്യത കരസ്ഥമാക്കുകയും ചെയ്തു.