അമ്പലപ്പുഴ: അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലെ പതക്കം നഷ്ടപ്പെട്ട സംഭവത്തില്‍ കുറ്റക്കാരായ ജീവനക്കാരെ സസ്‌പെന്‍ഡ് ചെയ്യണമെന്നാവശ്യപ്പെട്ട് സമരസമിതിയുടെ നേതൃത്വത്തില്‍ പ്രതിഷേധ മാര്‍ച്ചും ധര്‍ണയും നടത്തി. അമ്പലപ്പുഴ ദേവസ്വം അസി. കമ്മീഷണര്‍ ഓഫിസിന് മുന്നിലാണ് ധര്‍ണ സംഘടിപ്പിച്ചത്. പതക്കം നഷ്ടപ്പെട്ട് ഒരു മാസത്തിനുശേഷം ഇവ കാണിക്കവഞ്ചികളില്‍നിന്ന് ലഭിച്ചിരുന്നു.
ഒരു മാസം പിന്നിട്ടിട്ടും പ്രതികളെ പിടികൂടാന്‍ അന്വേഷണ ഉദ്യോഗസ്ഥര്‍ക്ക് കഴിഞ്ഞിട്ടില്ല.കുറ്റക്കാരായ ജീവനക്കാരെ സംരക്ഷിക്കുന്ന നിലപാടാണ് ദേവസ്വം ബോര്‍ഡും സ്വീകരിച്ചിരിക്കുന്നത്. സമരത്തിന്റെ അടുത്ത ഘട്ടമായി അമ്പലപ്പുഴയില്‍ ഹര്‍ത്താല്‍ നടത്താനും സമരസമിതി തീരുമാനിച്ചു.
സമരസമിതി ജനറല്‍ കണ്‍വീനര്‍ അനില്‍ പാഞ്ചജന്യം ധര്‍ണ ഉദ്ഘാടനം ചെയ്തു. ശങ്കരന്‍നായര്‍, എല്‍.പി ജയചന്ദ്രന്‍, ഡി.സുഭാഷ്, മനോജ് കുമാര്‍, ഉണ്ണിക്കൃഷ്ണന്‍, ശ്രീകുമാര്‍, ബിജു തുടങ്ങിയവര്‍ ധര്‍ണയ്ക്ക് നേതൃത്വം നല്‍കി.