കൂടരഞ്ഞി: വലയില്‍ കുടുങ്ങിയ പെരുമ്പാമ്പിനെ ഒടുവില്‍ ഫോറസ്റ്റ് സംഘം രക്ഷപ്പെടുത്തി. താഴെ കൂടരഞ്ഞി മുതുവമ്പായിയില്‍ ഇന്നലെ രാവിലെയാണ് സംഭവം.
മുഖാലയില്‍ സജിയുടെ വീട്ടിലെ കോഴിക്കൂട്ടിനു സമീപമാണ് പെരുമ്പാമ്പിനെ കണ്ടത്. കൂട് തുറക്കാന്‍ ചെന്നപ്പോള്‍ സമീപത്തുണ്ടായിരുന്ന വലയില്‍ കുരുങ്ങിയ നിലയില്‍ പെരുമ്പാമ്പിനെ കണ്ടെത്തുകയായിരുന്നു. ഉടന്‍ ഫോറസ്റ്റ് ഉദ്യോഗസ്ഥരെ വിവരമറിയിക്കുകയായിരുന്നു.
വനം വകുപ്പിന്റെ റാപ്പിഡ് റെസ്‌പോണ്‍സ് ടീമിലെ സജീവ് കുമാര്‍, മുരളി, റാശിദ് തിരുവമ്പാടി എന്നിവരുടെ നേതൃത്വത്തില്‍ വല മുറിച്ച് പാമ്പിനെ പുറത്തെടുക്കുകയായിരുന്നു. പതിമൂന്ന് കിലോയോളം തൂക്കം വരുന്ന പെരുമ്പാമ്പിന് ഏഴ് അടി നീളമുണ്ട്.