കാക്കനാട്: റോഡില്‍ കാന കുഴിച്ച് മൂടി വീണ്ടും ടാര്‍ ചെയതത് അടര്‍ന്ന് വീണു റോഡ് തോടായി മാറി. കാക്കനാട് പടമുകള്‍ മുതല്‍ ചെമ്പ്മുക്ക് വരെയുള്ള സിവില്‍ലൈന്‍ റോഡിന്റെ അവസ്ഥയാണിത്.
ഗേയിലിന്റെ എല്‍.എന്‍.ജി. പൈപ്പ് ലൈന്‍ സ്ഥാപിക്കാന്‍ ഈ റോഡിന്റെ തെക്കുവശം കുഴിയെടുത്തിരുന്നു. പൈപ്പ് ലൈന്‍ സ്ഥാപിച്ച ശേഷം ഈ കുഴി മണ്ണിട്ട് മൂടിയെങ്കിലും ടാര്‍ ചെയ്തിരുന്നില്ല. ഇതേ തുടര്‍ന്ന് വാഹനങ്ങള്‍ വീണ്ടും ഓടി ഇവിടെ വീണ്ടും കുഴിയായി മാറുകയും ചെറുവാഹനങ്ങള്‍ കുഴിയില്‍ വീണ് അപകടങ്ങള് ഉണ്ടാകുന്നത് പതിവാകുകയും ചെയ്തു. വാഹനങ്ങള്‍ പോകുമ്പോള്‍ കുഴിയിലെ ചെറിയ മെറ്റലുകള്‍ കാല്‍നടയാത്രക്കാരില്‍ തെറിച്ച് കൊള്ളുന്നതും പതിവായി.
വാഹനങ്ങള്‍ തുരതുര പോകുന്നതിനാല്‍ വാഴക്കാലയിലെ കച്ചവട സ്ഥാപനങ്ങള്‍ പൊടിപടലമായി മാറി. തുടര്‍ന്ന് പ്രമുഖ രാഷ്ടീയ പാര്‍ട്ടികള്‍ പൈപ്പ് ലൈനായി കുഴിച്ച സ്ഥലം ടാര്‍ ചെയ്തു അറ്റകുറ്റപണി പൂര്‍ത്തിയാക്കി ഗതാഗതയോഗ്യമാക്കണമെന്നാവശ്യപ്പെട്ട് പ്രധാന റോഡില്‍ ഉപരോധസമരങ്ങള്‍ വരെ ചെയ്തു. അതോടെ എല്‍.എന്‍.ജി. പൈപ്പ്‌ലൈന്‍ സ്ഥാപിക്കല്‍ നിര്‍ത്തിവച്ചിരുന്നു. ഈ അടുത്താണ് കുഴിയെടുത്ത ഭാഗങ്ങള്‍ ടാര്‍ ചെയ്തത്.
എന്നാല്‍ മഴ ശക്തമായി പെയ്തതോടെ ടാറുകളെല്ലാം അടര്‍ന്നു പോയി  ആ ഭാഗങ്ങളെല്ലാം ചെറിയ കുഴികളായി മാറി. ഇതോടെ ചെറു വാഹനങ്ങള്‍ ഉള്‍പ്പെടെ അപകടത്തില്‍പ്പെടുന്നത് പതിവായിരിക്കുകയാണ്. അറ്റകുറ്റപണിയിലുള്ള അനാസ്ഥയാണ് ഇതിന് കാരണമെന്ന് നാട്ടുകാര്‍ പറഞ്ഞു.