കൊല്‍ക്കത്ത: നേപ്പാളിനെ തോല്‍പ്പിച്ച് അണ്ടര്‍ 15 സാഫ് കപ്പ് കിരീടം ഇന്ത്യ സ്വന്തമാക്കി. കൊല്‍ക്കത്തയില്‍ നടന്ന മല്‍സരത്തില്‍ എതിരില്ലാത്ത ഏഴു ഗോളുകള്‍ക്കാണ് നേപ്പാളിനെ ഇന്ത്യന്‍ കുട്ടികള്‍ തകര്‍ത്തത്. ഗ്രൂപ്പ് ഘട്ടത്തിലും ഇന്ത്യ നേപ്പാളിനെ തകര്‍ത്തിരുന്നു. അന്ന് എതിരില്ലാത്ത അഞ്ചു ഗോളുകള്‍ക്കായിരുന്നു ഇന്ത്യയുടെ ജയം.
ശ്രീദര്‍ത്തിന്റെ ഹാട്രിക്കാണ് ഫൈനല്‍ ഏകപക്ഷീയമാക്കിയത്. രണ്ടാം പകുതിയിലായിരുന്നു മൂന്നു ഗോളുകളും പിറന്നത്. മഹേസന്‍, അമന്ദീപ്, സിബജിത്ത്, ഹിമാന്‍ഷ് എന്നിവരാണ് മറ്റു സ്‌കോറര്‍മാര്‍.
ഗ്രൂപ്പ് ഘട്ടം മുതല്‍ ഏകപക്ഷീയമായ മുന്നേറ്റമാണ് ഇന്ത്യന്‍ ടീം നടത്തിയത്. നാലു മല്‍സരവും ജയിച്ച് 12 പോയിന്റ് നേടിയാണ് ഇന്ത്യ ഫൈനലിലെത്തിയത്. ഫൈനലിലേതുള്‍പ്പെടെ അഞ്ചു മല്‍സരങ്ങളില്‍ 28 ഗോള്‍ നേടിയ ഇന്ത്യ ഒരു ഗോള്‍ പോലും വഴങ്ങിയിട്ടില്ല. നാലു മല്‍സരങ്ങളില്‍ നിന്ന് 11 ഗോളാണ് നേപ്പാളിന്റെ സമ്പാദ്യം.