കാളികാവ്: ഗുഡ്‌സ് ഓട്ടോയില്‍ മണല്‍ കടത്തിയ മൂന്ന് പേരെ പൊലിസ് പിടികൂടി. അഞ്ചച്ചവിടി പരിയങ്ങാടിലെ ഇരഞ്ഞിയില്‍ റാഷിദ് (19), മാളിയേക്കല്‍ കുന്നിലെ മൂച്ചിക്കല്‍ ഇര്‍ഷാദ്(23), അഞ്ചവിടി പരിയങ്ങാട്ടിലെ കോട്ടവാഴക്കല്‍ സറഫുദ്ദീന്‍(24) എന്നിവരെയാണ് പൊലിസ് പിടികൂടിയത്. അഞ്ചച്ചവിടി പരിയങ്ങാട് പുഴയില്‍ നിന്ന് മണല്‍ കടത്തികൊണ്ടു പോകുന്ന വാഹനം പൊലിസ് തടഞ്ഞു.
നിര്‍ത്താതെ പോയ വാഹനത്തെ പൊലിസ് പിന്തുടര്‍ന്ന് പിടികൂടുമെന്ന് ഉറപ്പായതോടെ വാഹനത്തിലുണ്ടായിരുന്നവര്‍ ഓടി രക്ഷപ്പെട്ടു. മണല്‍ കയറ്റിയ വാഹനം പൊലിസുകാരന്‍ ഓടിച്ച് സ്റ്റേഷനില്‍ എത്തിച്ചു. തുടര്‍ന്ന് നടന്ന അന്വേഷണത്തില്‍ പ്രതികളെ പിടികൂടുകയായിരുന്നു. കാളികാവ് എസ്.ഐ പി.ജെ കൂര്യക്കോസ്, എ.എസ്.ഐ എ.രാജന്‍, സീനിയര്‍ സിവില്‍ പൊലിസ് ഓഫീസര്‍ പി. നിയാസ് എന്നിവര്‍ ചേര്‍ന്നാണ് പ്രതികളെ പിടികൂടിയത്.