കൊണ്ടോട്ടി: പ്രധാനാധ്യാപകനേയും സ്‌കൂള്‍ മാനേജറേയും അറിയിക്കാതെ രാത്രിയില്‍ സ്‌കൂളില്‍ കടന്ന ഉപവിദ്യാഭ്യാസ ഡയറക്ടര്‍ക്കെതിരെ സ്‌കൂള്‍ മാനേജറുടെ പരാതി.
കിഴിശ്ശേരി ഗണപത് യു.പി സ്‌കൂള്‍ മാനേജര്‍ ഒ.പി ശാരദാമ്മയാണ് ഡി.ഡി.ഇ പി.സഫറുല്ലക്ക് എതിരെ കൊണ്ടോട്ടി പൊലിസില്‍ പരാതി നല്‍കിയത്. കഴിഞ്ഞ വെള്ളി രാത്രി പത്തോടെ ഡി.ഡി.ഇ  പ്രധാനാധ്യാപകനേയും മാനേജറേയും അറിയിക്കാതെ സ്‌കൂളിലത്തെിയെന്നാണ് പരാതി.
സംഭവത്തില്‍ പൊലിസ് എഫ്.ഐ.ആര്‍ രജിസ്റ്റര്‍ ചെയ്ത് കേസെടുത്തിട്ടുണ്ട്. ഡി.ഡി.ഇ സ്‌കൂളിലെ സെക്യൂരിറ്റി ജീവനക്കാരനൊപ്പം ഓഫീസ് മുറി വരെ സന്ദര്‍ശിച്ച് തിരിച്ച് പോരുകയായിരുന്നുവെന്നാണ് പരാതിയില്‍ പറയുന്നത്.
എന്നാല്‍ ജില്ലയിലെ മികച്ച പി.ടി.എക്കുള്ള അവാര്‍ഡ് നല്‍കുന്നതിന്റെ ഭാഗമായി സ്‌കൂളിന്റെ അടിസ്ഥാന സൗകര്യങ്ങള്‍ പരിശോധിക്കുന്നതിനാണ് എത്തിയതെന്ന് ഡി.ഡി.ഇ പറയുന്നു. തനിക്കൊപ്പം ഡി.ഡി.ഇ ഓഫീസിലെ രണ്ട് ജീവനക്കാരും തൊട്ട് മുന്‍പ് പരിശോധന നടത്തിയ ഒഴുകൂര്‍ സ്‌കൂളിലെ അധ്യാപകരും കൂടെയുണ്ടായിരുന്നു. ഓഫീസും പരിസരവും നിരീക്ഷിച്ച ശേഷം മടങ്ങിയതായി ഡി.ഡി.ഇ പറഞ്ഞു.