മസ്‌കത്ത്: തുടര്‍ച്ചയായ മൂന്ന് ജയങ്ങള്‍ക്ക് ശേഷം ഏഷ്യന്‍ ചാംപ്യന്‍സ് ഹോക്കി ടൂര്‍ണമെന്റില്‍ ഇന്ത്യക്ക് ഗോള്‍ രഹിത സമനില. ഏഷ്യന്‍ ചാംപ്യന്‍മാരായ മലേഷ്യയാണ് ഇന്ത്യയെ സമനിലയില്‍ തളച്ചത്. ഗോളുകള്‍ നേടാന്‍ ഇന്ത്യക്ക് മികച്ച അവസരങ്ങള്‍ ലഭിച്ചെങ്കിലും ലക്ഷ്യം കാണാനായില്ല. ടൂര്‍ണമെന്റില്‍ 10 പോയിന്റുമായി ഇന്ത്യയാണ് മുന്നില്‍.
ഏഷ്യന്‍ ഗെയിംസില്‍ മലേഷ്യയ്‌ക്കെതിരേയുള്ള തോല്‍വിക്ക് പകരംവീട്ടാനുള്ള സുവര്‍ണാവസരമാണ് ഇന്ത്യ കളഞ്ഞുകുളിച്ചത്. ഒമാനെ 11-0 എന്ന നിലയിലും പാകിസ്താനെ 3-1 എന്ന നിലയിലും ജപ്പാനെ 9-0 എന്ന നിലയിലും ആദ്യത്തെ മൂന്ന് മത്സരങ്ങളില്‍ ഇന്ത്യ തോല്‍പ്പിച്ചിരുന്നു. ഇന്ത്യയും മലേഷ്യയും നേരത്തെ തന്നെ സെമിഫൈനല്‍ ബര്‍ത്ത് ഉറപ്പിച്ചതിനാല്‍ കളിയിലെ ഫലം നിര്‍ണായകമായിരുന്നില്ല.
ഇന്ത്യ ലോക റാങ്കിങ്ങില്‍ അഞ്ചാം സ്ഥാനത്താണിപ്പോള്‍. നിലവിലുള്ള ഇന്ത്യയുടെ പ്രകടനം അടുത്ത മത്സരങ്ങളിലും നിലനിര്‍ത്തിയാല്‍ ചാംപ്യന്‍സ് ട്രോഫി ഹോക്കി ജേതാക്കളാകാമെന്ന വിശ്വാസത്തിലാണ് ടീം. ചാംപ്യന്‍മാരായാല്‍ ഇന്ത്യക്ക് ലോകകപ്പില്‍ അത് മുതല്‍കൂട്ടാകും.