കോഴിക്കോട്: ഹര്‍ത്താലിന് യാത്രക്കാര്‍ക്ക് തുണയായി പൊലിസ്. കോഴിക്കോട് റെയില്‍#േവസ്‌റ്റേഷനു മുന്നിലാണ് ഹര്‍ത്താലില്‍ വലഞ്ഞയാത്രക്കാര്‍ക്ക് പൊലിസ് തുണയായത്. ട്രെയിനിറങ്ങുന്ന യാത്രക്കാരെ വിവിധ സ്ഥലങ്ങളിലെത്തിക്കാന്‍ പൊലിസ് കണ്‍ട്രോള്‍ റൂമിന്റെ നേതൃത്വത്തില്‍ രണ്ട് വാനുകളും മറ്റു വാഹനങ്ങളും രംഗത്തെത്തുകയായിരുന്നു.
 സ്‌റ്റേഷനു മുന്നിലെ റോഡില്‍ യാത്രക്കാരെ കയറ്റി മെഡിക്കല്‍ കോളജ് വരെ എത്തിക്കാനാണ് പൊലിസ് വാഹനങ്ങളെത്തിയത്. രാവിലെ മുതല്‍ നിരവധി തവണ രണ്ട് പൊലിസ് വാനുകള്‍ ഇവിടെ പ്രവര്‍ത്തനക്ഷമമായിരുന്നു. ട്രെയിനിറങ്ങിയെത്തിയ യാത്രക്കാര്‍ക്ക് കെ.എസ്.ആര്‍.ടി.സി സ്റ്റാന്റിലേക്കും മൊഫ്യൂസില്‍ സ്റ്റാന്റിലേക്കും പോകാനുള്ള സഹായവും പൊലിസുകാരുണ്ടാക്കി. സി.പി.എം പ്രഖ്യാപിച്ച ജില്ലാ ഹര്‍ത്താലില്‍ വാഹനങ്ങള്‍ തടയില്ലെന്ന് പ്രഖ്യാപിച്ചിട്ടും സ്വകാര്യ ബസുകള്‍ ഇന്നലെ റോഡിലിറങ്ങിയിരുന്നില്ല. ടൗണ്‍ ബസുകളും രംഗത്തിറങ്ങാതായതോടെ വിവിധ സ്ഥലങ്ങളിലെത്തേണ്ട യാത്രക്കാര്‍ പ്രയാസത്തിലായി. റെയില്‍വേ ഓട്ടോ സ്റ്റാന്റിലും വാഹനങ്ങളുണ്ടായിരുന്നില്ല. എന്നാല്‍ ചില ഓട്ടോകള്‍ റോഡിലിറങ്ങി. ചിലര്‍ അവസരത്തിനൊത്ത് യാത്രക്കാരില്‍ നിന്നു കൂടുതല്‍ പണം ഈടാക്കിയതായും പറയപ്പെടുന്നു.