കണ്ണൂര്‍: കണ്ണൂര്‍ കോര്‍പ്പറേഷന്‍ ഭരണം പൂര്‍ണമായി യു.ഡി.എഫിന്. ഡെപ്യൂട്ടി മേയര്‍ പി.കെ രാകേഷിനെതിരെ എല്‍.ഡി.എഫ് കൊണ്ടുവന്ന അവിശ്വാസപ്രമേയം പരാജയപ്പെട്ടു. 55 അംഗ കൗണ്‍സിലില്‍ 26 അംഗങ്ങളുടെ പിന്തുണ മാത്രമാണ് എല്‍.ഡി.എഫിന് നേടാനായത്. 28 അംഗങ്ങളുടെ പിന്തുണയായിരുന്നു അവിശ്വാസ പ്രമേയം പാസാകാന്‍ വേണ്ടിയിരുന്നത്.

എല്‍.ഡി.എഫിന്റെ പിന്തുണയോടെ ഡെപ്യൂട്ടി മേയര്‍ സ്ഥാനത്തെത്തിയ പി.കെ രാഗേഷ് മേയര്‍ക്കെതിരെയുളള യു.ഡി.എഫിന്റെ അവിശ്വാസ പ്രമേയത്തിനു അനുകൂലമായി വോട്ടു ചെയ്തതിനെ തുടര്‍ന്നാണ് ഇടതുമുന്നണി ഡെപ്യൂട്ടി മേയര്‍ക്കെതിരേ അവിശ്വാസം കൊണ്ടുവന്നത്.

55 അംഗ കൗണ്‍സിലില്‍ 27 വീതം കൗണ്‍സിലര്‍മാരാണ് എല്‍.ഡി.എഫിനും യു.ഡി.എഫിനും ഉണ്ടായിരുന്നത്. കോണ്‍ഗ്രസില്‍ നിന്നു പുറത്താക്കിയതിനെ തുടര്‍ന്ന് ഐക്യജനാധിപത്യ സംരക്ഷണസമിതിയെന്ന പേരില്‍ മത്സരിച്ച പി.കെ രാഗേഷ് മേയര്‍ തെരഞ്ഞെടുപ്പില്‍ എല്‍.ഡി.എഫിനെ പിന്തുണക്കുകയായിരുന്നു. പക്ഷെ ഡെപ്യൂട്ടി മേയര്‍ തെരഞ്ഞെടുപ്പില്‍ നിന്നു രാഗേഷ് വിട്ടു നിന്നു. പിന്നീട് നറുക്കെടുപ്പിലൂടെ മുസ്‌ലിം ലീഗിലെ സി. സമീര്‍ തെരഞ്ഞെടുക്കപ്പെടുകയും സമീറിനെതിരെ എല്‍.ഡി.എഫ് കൊണ്ടുവന്ന അവിശ്വാസം പാസാകുമെന്നുറപ്പായതോടെ അദ്ദേഹം രാജിവയ്ക്കുകയായിരുന്നു. തുടര്‍ന്നാണ് പി.കെ രാഗേഷ് എല്‍.ഡി.എഫ് പിന്തുണയോടെ ഡെപ്യൂട്ടി മേയറായത്.