കാരയ്ക്കയുടെ പ്രത്യേകത എക്കാലത്തും മുസ്‌ലിംകള്‍ക്കിടയില്‍ സംതൃപ്തിയുടെ നിറവ് പകരുന്ന ഒന്നാണ്. നോമ്പുതുറക്കാന്‍ ഒരു ചീന്ത് കാരയ്ക്ക കൈയിലെത്തുമ്പോള്‍ വിശ്വാസിക്ക് അതിരറ്റ ആഹ്ലാദമാണ്. അറേബ്യയിലെ മുഖ്യ വിഭവമായ കാരയ്ക്ക പ്രവാചകന്‍ മുഹമ്മദ് നബി(സ്വ)യുടെ അധ്യാപനങ്ങളില്‍ വളരെ പരാമര്‍ശിക്കപ്പെട്ടിട്ടുള്ളതാണ്. നോമ്പ് തുറക്കുന്നത് കാരയ്ക്ക ഉപയോഗിച്ചാവുന്നത് പുണ്യമായാണ് കരുതുന്നത്. നോമ്പ് തുറക്കുവാന്‍ പാവപ്പെട്ടവരെ ക്ഷണിക്കുന്നത് സല്‍കര്‍മമായി ഇസ്‌ലാം കരുതുന്നു. സദ്യ നല്‍കാന്‍ കഴിവില്ലെങ്കില്‍ ഒരു കാരയ്ക്ക കഷണമെങ്കിലും കൊടുത്ത് പുണ്യം നേടാന്‍ പ്രവാചകന്‍ പഠിപ്പിക്കുന്നു. ഖുര്‍ആനില്‍ പലയിടത്തും സ്വര്‍ഗീയാനുഗ്രഹമായാണ് കാരയ്ക്കയെ വാഴ്ത്തുന്നത്. സ്വര്‍ഗത്തില്‍ വിശ്വാസികള്‍ക്കായി അല്ലാഹു ഒരുക്കിവച്ചിരിക്കുന്ന പഴങ്ങളില്‍ ഒന്നാണ് ഈന്തപ്പഴമെന്നും ഖുര്‍ആന്‍ പറയുന്നു.

ഗുണവും ഏറെ
ഒരു കപ്പ് കാരയ്ക്കയില്‍ 400 കലോറി ഊര്‍ജവും 90 ഗ്രാം ഷുഗറും 110 ഗ്രാം കാര്‍ബോ ഹൈഡ്രേറ്റും അടങ്ങിയിരിക്കുന്നു. ശരീരത്തില്‍ കൂടുതല്‍ ചാലകശക്തി നല്‍കുന്നതും എളുപ്പം ദഹനം സംഭവിക്കുന്നതുമായ ഒരു പ്രത്യേക തരം പഞ്ചസാരയാണ് ഈന്തപ്പഴത്തിലടങ്ങിയിട്ടുള്ളത്. ശരീരത്തില്‍ പഞ്ചസാരയുടെ അളവ് ക്രമാതീതമായി വര്‍ധിപ്പിക്കുന്ന ഗ്ലൂക്കോസ് ഇനത്തില്‍പെട്ട പഞ്ചസാരയല്ല ഈന്തപ്പഴത്തിലേത്. അതുകാരണം ഈ പഴം പ്രമേഹരോഗികള്‍ക്കും ഉപയോഗിക്കാവുന്നതാണ്. ഇതര പഴവര്‍ഗങ്ങള്‍ക്കില്ലാത്ത പല പ്രത്യേകതകളും ഈന്തപ്പഴത്തിന് അവകാശപ്പെടാനുണ്ട്. അതില്‍ ധാരാളം ഇരുമ്പുസത്ത് അടങ്ങിയിട്ടുണ്ട്. വേഗത്തില്‍ ദഹിക്കും. വയറിന് യാതൊരു അസുഖവുമുണ്ടാവുകയുമില്ല. മാത്രമല്ല ആമാശയ സംബന്ധമായ രോഗങ്ങള്‍ സുഖപ്പെടുത്തുകയും ചെയ്യും. ശരീരത്തിലെ ഇരുമ്പിന്റെ കുറവ് നികത്താന്‍ ദിവസവും ഈന്തപ്പഴം കഴിക്കുന്നത് ശീലമാക്കിയാല്‍ മതി. മക്കള്‍ക്ക് ദിവസവും ചോക്ലേറ്റും മിഠായിയും മറ്റും വാങ്ങികൊടുക്കുന്നതിനേക്കാള്‍ ഉത്തമം ഈന്തപ്പഴം വാങ്ങികൊടുക്കുന്നതാണ്. കുട്ടികളുടെ ആരോഗ്യത്തിനും അതുതന്നെയാണ് നല്ലത്.