കൊയിലാണ്ടി: മോഷണ ശ്രമത്തിനിടെ വീട്ടമ്മയ്ക്ക് മര്‍ദനമേറ്റതായി പരാതി. ഇന്നലെ രാവിലെ 5.45നാണ് സംഭവം. റെയില്‍വേ സ്റ്റേഷന്‍ പരിസരത്ത് മുത്താമ്പി റോഡില്‍ ടോള്‍ ബൂത്തിന് സമീപം തൊണ്ണാക്കാംപുറത്ത് ടി.പി രാജന്റെ ഭാര്യയും ഉള്ള്യേരി ഗോകുലം ചിട്ടികമ്പനി മാനേജറുമായ പത്മിനി (50)ക്കാണ് മര്‍ദനമേറ്റത്.
ഭര്‍ത്താവ് രാവിലെ നടക്കാനിറങ്ങിയ സമയത്താണ് യുവാവ് വീട്ടിനകത്ത് കടന്നത്. മുഖത്തും കഴുത്തിനും പരുക്കേറ്റ പത്മിനിയെ കൊയിലാണ്ടി താലൂക്ക് ആശുപത്രിയില്‍ പ്രവേശിപ്പിച്ചു. വീടിനകത്ത് കയറിയ മോഷ്ടാവ് ഇവരെ അക്രമിക്കുന്നതിനിടെ കുതറിയോടുകയായിരുന്നു. പത്മിനി ബെഡ്‌റൂമില്‍ കയറി വാതില്‍ അടച്ചശേഷം ജനല്‍തുറന്ന് ബഹളം വച്ചതിനെ തുടര്‍ന്ന് അയല്‍വീട്ടുകാര്‍ ഓടിയെത്തിയെങ്കിലും മോഷ്ടാവ് രക്ഷപ്പെട്ടു. കൊയിലാണ്ടി പൊലിസ് അന്വേഷണം ആരംഭിച്ചു.