ന്യൂഡല്‍ഹി: പാര്‍ലമെന്റ് പരിസരത്തേക്ക് കൈയില്‍ കത്തിയുമായി കടക്കാന്‍ ശ്രമിച്ചയാള്‍ പിടിയില്‍. ബലാല്‍സംഗക്കേസില്‍ ജയില്‍ ശിക്ഷ അനുഭവിക്കുന്ന വിവാദ ആള്‍ദൈവം ഗുര്‍മിത് റാം റഹിം സിങ്ങിന്റെ അനുയായിയാണ് ഇയാളെന്ന് പൊലിസ് പറഞ്ഞു.

ഡല്‍ഹിയിലെ ലക്ഷ്മിനഗര്‍ സ്വദേശി സാഗര്‍ ഇന്‍സ(25) ആണ് പിടിയിലായത്. തിങ്കളാഴ്ച രാവിലെ ബൈക്കിലാണ് ഇയാള്‍ എത്തിയത്. പാര്‍ലമെന്റിലെ സുരക്ഷാ ജീവനക്കാരാണ് ഇയാളെ പിടികൂടിയത്. തുടര്‍ന്ന് ഇയാളെ പാര്‍ലമെന്റ് പോലിസ് സ്റ്റേഷന്‍ അധികൃതര്‍ക്ക് കൈമാറി. ഇയാളെ ചോദ്യംചെയ്തുവരികയാണെന്ന് പൊലിസ് പറഞ്ഞു.