എരമംഗലം: സുഹൃത്തുമായുള്ള വാക്കേറ്റത്തിന് മധ്യസ്ഥനായ സി.പി.ഐ നേതാവിന് നേരെ ആക്രമണം.
സി.പി.ഐ കാപ്പിരിക്കാട് ബ്രാഞ്ച് സെക്രട്ടറി തെക്കൂട്ട് ഷൗക്കത്തലി (50)യ്ക്ക് നേരെയാണ് വധശ്രമമുണ്ടായത്. തലയോട്ടിക്ക് സാരമായി പരിക്കേറ്റ ഷൗക്കത്തലിയെ തൃശൂര്‍ ഗവ. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
കഴിഞ്ഞ ദിവസമാണ് സംഭവം. ഷൗക്കത്തലിയും സുഹൃത്ത് ഹനീഫയും ബൈക്കില്‍ വരുന്നതിനിടെ രണ്ട് പേര്‍ തടഞ്ഞു നിര്‍ത്തുകയും ഹനീഫയുമായി വാക്കേറ്റമുണ്ടാവുകയുമായിരുന്നു. ഇതിനിടയില്‍ മധ്യസ്ഥനായി വിഷയത്തില്‍ ഇടപെട്ട് സംസാരിച്ചതിനിടെയാണ് ഷൗക്കത്തലിക്ക് നേരെ ആക്രമണമുണ്ടായത്.
ഇരുമ്പ് കൊണ്ടുള്ള ഇടിവള ഉപയോഗിച്ച് തലയ്ക്ക് ഇടിക്കുകയായിരുന്നു. ഇടിയുടെ ആഘാതത്തില്‍ തലച്ചോറിനെ മൂടുന്ന പാടക്ക് പോറല്‍ പറ്റിയിട്ടുണ്ട്. പെരുമ്പടപ്പ് പൊലിസ് കേസെടുത്തു.