കൊണ്ടോട്ടി: കരിപ്പൂര്‍ വിമാനത്താവളം വഴി ദോഹയിലേക്ക് കടത്താന്‍ ശ്രമിച്ച രണ്ടരക്കോടിയുടെ ലഹരി മരുന്നുമായി യാത്രക്കാരന്‍ പിടിയില്‍. കണ്ണൂര്‍ കോടാലി കുഞ്ഞിപ്പള്ളി മുല്ലവീട്ടില്‍ ജാബിര്‍ (26) ആണ് കേന്ദ്രസുരക്ഷാ സേനയുടെ പിടിയിലായത്. ഖത്തര്‍ എയര്‍വെയ്‌സിന്റെ വിമാനത്തില്‍ ദോഹയിലേക്ക് പോകാനെത്തിയ ജാബിറിന്റെ ഹാന്‍ഡ്ബാഗ് കേന്ദ്ര സുരക്ഷാ സേന എക്‌സ്‌റേ പരിശോധന നടത്തുന്നതിനിടിയില്‍ സംശയം തോന്നുകയായിരുന്നു. തുടര്‍ന്ന് ബാഗ് കസ്റ്റഡിയിലെടുത്ത് വിശദപരിശോധന നടത്തിയപ്പോഴാണ് ഇതില്‍ നിന്ന് വെളുത്ത പൊടി കണ്ടെത്തിയത്. ബാഗിന്റെ അടിഭാഗത്തുണ്ടായിരുന്ന രഹസ്യ അറയില്‍ അതീവ രഹസ്യമായാണ് ഇത് സൂക്ഷിച്ചിരുന്നത്. ന്യൂജെന്‍ ലഹരിമരുന്നായി അറിയപ്പെടുന്ന 530 ഗ്രാം എം.ഡി.എം.എയാണ് ഇയാളില്‍ നിന്ന് കണ്ടെടുത്തത്.
പ്രതിയെ കൂടുതല്‍ ചോദ്യം ചെയ്യുന്നതിനായി കൊച്ചിയില്‍ നിന്നെത്തിയ നാര്‍ക്കോട്ടിക് വിഭാഗത്തിന് കൈമാറി. പാര്‍ട്ടികളിലും മറ്റും ലഹരിക്കായി ഉപയോഗിക്കുന്നവയാണിത്. പിടികൂടിയ മയക്കുമരുന്നിന് രണ്ടരക്കോടിയോളം വിലവരും. ജാബിറിനെ ചോദ്യം ചെയ്യുന്നത് വഴി കൂടുതല്‍ വിവരങ്ങള്‍ ലഭിക്കുമെന്നുള്ള പ്രതീക്ഷയിലാണ് അന്വേഷണ സംഘം.