നെടുങ്കണ്ടം: പ്രായപൂര്‍ത്തിയാവാത്ത പെണ്‍കുട്ടിയെ പീഡിപ്പിച്ച് ഗര്‍ഭിണിയാക്കിയ സംഭവത്തില്‍ സഹോദരീ ഭര്‍ത്താവ് അറസ്റ്റിലായി. മണിമല കോത്തലപ്പടി കൈതപ്പാറക്കുടിയില്‍ പ്രിന്‍സ് (27) ആണ് പിടിയിലായത്.  പ്ലസ് വണ്‍ വിദ്യാര്‍ഥിനിയായിരുന്ന പെണ്‍കുട്ടി ഏപ്രില്‍ ഏഴിന് വീട്ടില്‍ വച്ച് പ്രസവിക്കുകയായിരുന്നു. പെണ്‍കുട്ടിയുടെ മൂത്ത സഹോദരിയുടെ ഭര്‍ത്താവാണ് പ്രിന്‍സ്. തടിപ്പണിക്കാരനായ ഇയാള്‍ ഭാര്യയുടെ വീട്ടിലായിരുന്നു താമസിച്ച് ജോലി ചെയ്തിരുന്നത്.  പെണ്‍കുട്ടിയ്ക്ക് ഇപ്പോള്‍ പ്രായപൂര്‍ത്തിയായെന്നും പൊലിസ് അറിയിച്ചു.
പ്രസവം നടന്നയുടന്‍ തന്നെ പെണ്‍കുട്ടിയെയും കുഞ്ഞിനെയും വീട്ടുകാര്‍ പ്രതിയുടെ വീട്ടിലേക്കുമാറ്റി. നെടുങ്കണ്ടം മേഖലയില്‍ പെണ്‍കുട്ടി പ്രസവിച്ചെന്ന വാര്‍ത്ത പ്രചരിച്ചതിനെ തുടര്‍ന്ന് വനിത എസ്‌ഐയുടെ നേതൃത്വത്തില്‍ രണ്ടുമാസം മുമ്പ് പെണ്‍കുട്ടിയുടെ വീട്ടിലെത്തി വിവരങ്ങള്‍ ശേഖരിച്ചിരുന്നു. സ്‌പെഷല്‍ ബ്രാഞ്ചും വീട്ടിലും സമീപ പ്രദേശത്തും അന്വേഷണം നടത്തിയെങ്കിലും വിവരങ്ങളൊന്നും ലഭിച്ചില്ല. തുടര്‍ന്ന് ചൈല്‍ഡ് ലൈന്‍ പ്രവര്‍ത്തകര്‍ നടത്തിയ അന്വേഷണത്തിലാണ് സംഭവം പുറത്തായത്. പ്രതിയെ ഇന്ന് നെടുങ്കണ്ടം കോടതിയില്‍ ഹാജരാക്കും.