തേഞ്ഞിപ്പലം: സമസ്ത കേരള ജംഇയ്യത്തുല്‍ മുഅല്ലിമീന്‍ അറുപതാം വാര്‍ഷിക സമ്മേളനത്തിന്റെ ഭാഗമായി സെപ്റ്റംബര്‍ മുപ്പതിന് മുന്‍പായി സമസ്തയുടെ 9,968 മദ്‌റസകളിലും സുപ്രഭാതം ബാലക്ലബ് രൂപീകരിക്കും. മദ്‌റസ മാനേജ്‌മെന്റ് കമ്മിറ്റി പ്രസിഡന്റ്, സദര്‍ മുഅല്ലിം, എസ്.കെ.എസ്.എസ്.എഫ്, എസ്.കെ.എസ്.ബി.വി ഘടകങ്ങളില്‍ നിന്ന് മൂന്ന് വീതം പ്രതിനിധികളെ ഉള്‍കൊള്ളിച്ചാണ് ക്ലബ്ബിന് രൂപം നല്‍കുക. യൂനിറ്റ് ചെയര്‍മാന്‍, കണ്‍വീനര്‍ എന്നിവരെ ഉള്‍പ്പെടുത്തി റെയിഞ്ച് തലത്തിലും റെയിഞ്ച് ചെയര്‍മാന്‍, കണ്‍വീനര്‍ എന്നിവരെ ഉള്‍പ്പെടുത്തി ജില്ലാ തലത്തിലും ജില്ലാ ചെയര്‍മാന്‍, കണ്‍വീനര്‍മാരെ ഉള്‍പ്പെടുത്തി സംസ്ഥാന തലത്തിലും കമ്മിറ്റിക്ക് രൂപം നല്‍കും.
മാസാ മാസം മദ്‌റസതലത്തിലുള്ള ക്ലബ്ബുകളുടെ ആഭിമുഖ്യത്തില്‍ വായനാലോകം, സാഹിത്യ ചര്‍ച്ച, സുപ്രഭാതം - കുരുന്നുകള്‍ - സന്തുഷ്ട കുടുംബം ആസ്പദമാക്കിയുള്ള ക്വിസ് മത്സരം, കഥാ രചന, കവിത രചന എന്നിവ നടക്കും.
സുപ്രഭാതം ബാലക്ലബ് രൂപീകരണ റിപ്പോര്‍ട്ടും ഭാരവാഹി ലിസ്റ്റും മുപ്പതിന് മുന്‍പായി എസ്.കെ.ജെ.എം.സി.സി ഓഫിസില്‍ എത്തിക്കണമെന്ന് ജനറല്‍ കണ്‍വീനര്‍ ഡോ.ബഹാഉദ്ദീന്‍ മുഹമ്മദ് നദവി അറിയിച്ചു.