കളമശേരി: ഏതുസമയത്തും മണ്ണിടിഞ്ഞ് വീട് നിലം പൊത്തുമെന്ന ഭീതിയിലാണ് ഉണിച്ചിറ തൈക്കാവ് ബ്ലായില്‍ പറമ്പില്‍ അഷ്‌റഫിന്റെ കുടുംബം. മഴ പെയ്തതോടെ അഷ്‌റഫിന്റെ മതില്‍ കെട്ടിനരികല്‍ നിന്ന് മണ്ണിടിഞ്ഞ് തുടങ്ങിയിട്ടുണ്ട്. താഴെത്താമസിക്കുന്ന ഭൂവുടമ പതിനഞ്ച് അടിയോളം ഉയരത്തില്‍ അഷ്‌റഫിന്റെ അതിരിനോട് ചേര്‍ത്ത് മണ്ണെടുത്തത് കൊണ്ടാണ് വീട് അപകട നിലയിലായത്.
മണ്ണെടുത്ത സമയം മുതല്‍ താഴെ മുതല്‍ സംരക്ഷണ ഭിത്തി കെട്ടിത്തരാമെന്ന് പറയുന്നുണ്ടെങ്കിലും ഇത് വരെ ചെയ്തിട്ടില്ലെന്നും മഴ കനത്തതോടെ ഭാര്യയും രണ്ട് കുട്ടികളുമടങ്ങിയ കുടുംബം ഭീതിയിലാണ് താമസിക്കുന്നതെന്നും അഷ്‌റഫ് പറഞ്ഞു. അധികൃതരുടെ ഭാഗത്ത് നിന്ന് നടപടിയുണ്ടാകുമെന്ന പ്രതീക്ഷയില്‍ നഗരസഭ സെക്രട്ടറിക്ക് പരാതി നല്‍കി കാത്തിരിക്കുകയാണ് അഷറഫിന്റെ കുടുംബം.