കോട്ടക്കല്‍: കെട്ടിടം പണിത് വര്‍ഷങ്ങളായിട്ടും അങ്കണവാടിയില്‍ വൈദ്യുതി എത്താത്തതിനാല്‍ പഠനം ബുദ്ധിമുട്ടില്‍. പറപ്പൂര്‍ പഞ്ചായത്തിലെ 19ാം വാര്‍ഡിലുള്ള അങ്കണവാടിയിലെ കുട്ടികളും ജീവനക്കാരുമാണ് വൈദ്യുതി ഇല്ലാത്തതിനാല്‍ ബുദ്ധിമുട്ടുന്നത്.
1999ല്‍ കെട്ടിട നിര്‍മാണം പൂര്‍ത്തിയാക്കി പ്രവര്‍ത്തനം ആരംഭിച്ചതാണ്. കഴിഞ്ഞ വേനലിലെല്ലാം ചൂട് സഹിച്ചാണ് കുട്ടികള്‍ ഇവിടെ പഠനം നടത്തിയത്. മഴക്കാലമായാല്‍ വെളിച്ചക്കുറവും കൊതുകിന്റെ ശല്യവും കൂടും. അങ്കണവാടിയിലെ വൈദ്യുതി ക്ഷാമം കാരണം രക്ഷിതാക്കള്‍ക്ക് പറഞ്ഞയക്കാന്‍ മടിയാണിപ്പോള്‍. നിലവില്‍ പതിനഞ്ച് കുട്ടികളാണ് അങ്കണവാടിയിലെത്തുന്നത്.  നിരവധിതവണ പഞ്ചായത്ത് അധികൃതരോട് പരാതിപ്പെട്ടിട്ടും പരിഹാരമുണ്ടായില്ലെന്ന് നാട്ടുകാര്‍ പറയുന്നു. അങ്കണവാടി വൈദ്യുതീകരണം അടിയന്തിരമായി പരിഹരിക്കണമെന്ന് വട്ടപ്പറമ്പ് സ്‌പോര്‍ട്ട്‌ലൈന്‍ ക്ലബ്ബ് ഭാരവാഹികള്‍ ആവശ്യപ്പെട്ടു.