വേങ്ങര: മാസങ്ങളായി വലിയോറ പുത്തനങ്ങാടി ടൗണിലെത്തുന്നവരെ പ്രയാസപ്പെടുത്തിയ  മാലിന്യക്കൂമ്പാരം പഞ്ചായത്ത് അധികൃതര്‍ നീക്കം ചെയ്തു. പോസ്റ്റ് ഓഫിസ് പരിസരത്ത് തര്‍ക്കത്തിലിരിക്കുന്ന ഭൂമിയിലാണ് മത്സ്യ മാംസ മാര്‍ക്കറ്റുകളില്‍ നിന്നും വീടുകളില്‍ നിന്നും ഉപേക്ഷിക്കുന്ന അറവുമാലിന്യങ്ങള്‍, ഭക്ഷണാവശിഷ്ടങ്ങള്‍, പഴം, പച്ചക്കറി വേസ്റ്റുകള്‍ പ്ലാസ്റ്റിക് എന്നിവകൊണ്ടു വന്നുതള്ളിയിരുന്നത്.
ഇതു ഇവിടെ കിടന്ന് ചീഞ്ഞ് നാറി പരിസരപ്രദേശങ്ങളിലൂടെ ഒഴുകി മലിനീകരണമുണ്ടാക്കുകയും പരിസരം ദുര്‍ഗന്ധപൂരിതമാക്കുകയും ചെയ്തത് സംബന്ധിച്ച് നേരത്തേ സുപ്രഭാതം വാര്‍ത്ത നല്‍കിയിരുന്നു. ഇതേത്തുടര്‍ന്നാണ് അധികൃതര്‍ നടപടി സ്വീകരിച്ചത്. പ്ലാസ്റ്റിക്കടക്കം ഏഴ് ലോഡ് മാലിന്യങ്ങളാണ് ഇവിടെ നിന്ന് ശേഖരിച്ചത്. ഇവ അധികൃതര്‍ ശാസ്ത്രീയമായി സംസ്‌കരിച്ചു. ഇനി മാലിന്യം കൊണ്ടുവന്ന് ഇവിടെ തള്ളുന്നവരെ കണ്ടെത്താന്‍ പരിസരവാസി സി.സി.ടി.വിയും സ്ഥാപിച്ചിട്ടുണ്ട്. പ്രസിഡന്റ് വി.കെ കുഞ്ഞാലന്‍കുട്ടി, അംഗം പി അസീസ് എന്നിവര്‍ മേല്‍നോട്ടം വഹിച്ചു