കേളകം: കൊട്ടിയൂര്‍ വൈശാഖോത്സവത്തിനു ഇന്നലെ വന്‍ ഭക്തജനതിരക്ക്. അവധി ദിനമായതിനാല്‍ രാവിലെ മുതല്‍ ആയിരക്കണക്കിനു ഭക്തരാണ് അക്കരെ സന്നിധിയിലെത്തിയത്. ഭക്തരുടെ ക്യൂ ഇടബാവലിയും കഴിഞ്ഞതോടെ പൊലിസെത്തിയാണ് നിയന്ത്രിച്ചത്. സേവാഭാരതിയുടെ നേതൃത്വത്തില്‍ ഇന്നലെ അന്നദാനം നടത്തി. വിവിധ സംഘടനകളുടെ ആഭിമുഖ്യത്തില്‍ ചുക്ക്കാപ്പി വിതരണവും ഉണ്ടായിരുന്നു. ക്ഷേത്ര പരിസരങ്ങളില്‍ ഇരിട്ടി ഡിവൈ.എസ്.പി പ്രജീഷ് തോട്ടത്തില്‍, പേരാവൂര്‍ സി.ഐ എ. കുട്ടികൃഷ്ണന്‍, കേളകം എസ്.ഐ ടി.വി പ്രദീഷ് എന്നിവരുടെ നേതൃത്വത്തില്‍ കനത്ത സുരക്ഷ ഒരുക്കിയിരുന്നു. വൈശാഖോത്സവത്തിലെ ആദ്യ ആരാധനയായ തിരുവോണം ആരാധന ബുധനാഴ്ച നടക്കും. കേളകം മുതല്‍ കൊട്ടിയൂര്‍ വരെ മണിക്കൂറുകള്‍ നീളുന്ന ഗതാഗതകുരുക്കുമുണ്ടായി.