നീലേശ്വരം: നിര്‍മാണം കഴിഞ്ഞു രണ്ടു വര്‍ഷത്തിലധികമായ അഴിത്തലയിലെ തൃക്കരിപ്പൂര്‍ തീരദേശ പൊലിസ് സ്റ്റേഷന് ഒടുവില്‍ ശാപമോക്ഷം. 27 ന് മുഖ്യമന്ത്രി പിണറായി വിജയന്‍ പൊലിസ് സ്റ്റേഷന്‍ ഉദ്ഘാടനം ചെയ്യും. ടെലികോണ്‍ഫറന്‍സിലൂടെയായിരിക്കും ഉദ്ഘാടനം.
വൈദ്യുതി ലഭിക്കാത്തതും വഴിയില്ലാത്തതും ഉദ്ഘാടനം നീളാന്‍ കാരണമായി. ഇതെല്ലാം പരിഹരിച്ചെങ്കിലും പിന്നെയും ഉദ്ഘാടനം വൈകി.
സ്റ്റേഷനായി അഴിത്തലയില്‍ 40 ലക്ഷത്തോളം രൂപ ചെലവില്‍ ബോട്ട് ജെട്ടിയും നിര്‍മിച്ചിട്ടുണ്ട്. ഷിറിയ തീരദേശ പൊലിസ് സ്റ്റേഷനും അന്നു തന്നെ ഉദ്ഘാടനം ചെയ്യും. രാവിലെ 11ന് നടക്കുന്ന ചടങ്ങില്‍ മന്ത്രിമാരായ ഇ. ചന്ദ്രശേഖരന്‍, കടന്നപ്പള്ളി രാമചന്ദ്രന്‍ തുടങ്ങിയവര്‍ സംബന്ധിക്കും.