പുല്‍പ്പള്ളി: ചില തല്‍പ്പര കക്ഷികളുടെ ഗൂഢാലോചനയുടെ ഫലമാണ് കടമാന്‍തോട് പദ്ധതിയുമായി ബന്ധപ്പെട്ട ജനകീയ കണ്‍വെന്‍ഷന്‍ അലങ്കോലമാകാന്‍ കാരണമെന്ന് താല്‍ക്കാലിക കര്‍മസമിതി ഭാരവാഹികള്‍ അറിയിച്ചു. 2003ലെ വരള്‍ച്ചയോടെ സജീവ വിഷയമായി രൂപപ്പെട്ട ഈ പദ്ധതി പ്രദേശവാസികളുടെ പ്രതിഷേധത്തെ തുടര്‍ന്ന് നിശ്ചലമാവുകയായിരുന്നു. എന്നാല്‍ തുടര്‍ന്നു വന്ന വര്‍ഷങ്ങളിലുണ്ടായിട്ടുള്ള രൂക്ഷമായ വരള്‍ച്ച വീണ്ടും ഈ പദ്ധതിക്കായി മുറവിളികൂട്ടാന്‍ കാരണമായി.  കാവേരി നദീജല തര്‍ക്ക ട്രൈബ്യൂനല്‍ തീരുമാന പ്രകാരം ലഭിക്കേണ്ട വെള്ളത്തിന്റെ ഒരുഭാഗം ശേഖരിക്കുന്നതിന് കബനിയിലേക്ക് ഒഴുകുന്ന ജലം തടയപ്പെടേണ്ടതിന് ഒരു പദ്ധതി ആവശ്യമാണെന്നും അവിടെ കുടിയൊഴിപ്പിക്കപ്പെടുന്നവരുടെ പുനരധിവാസവും, സംരക്ഷണവും വസ്തു വകകള്‍ക്ക് തൃപ്തികരമായ വിലയും ലഭിക്കാന്‍ ആവശ്യമായ നടപടികളാണ് ആവശ്യം. കൂടുതല്‍ ജനങ്ങള്‍ക്ക് നഷ്ടം വരുത്താതെ പദ്ധതി പരിമിതപ്പെടുത്തി സര്‍വേ നടത്തണം. യോഗത്തില്‍ ജോസ് നെല്ലേടം. ജോസ് കുന്നത്ത്, എം.ആര്‍. ജനകന്‍, സ്റ്റീഫന്‍ പുകുടിയില്‍, കെ.സി. വര്‍ഗീസ് കൊളാശ്ശേരി, പി.ജെ. ആഗസ്തി പങ്കെടുത്തു.