തിരുവനന്തപുരം: പള്ളിക്കുള്ളില്‍ ഇരുന്നു മദ്യപിച്ചതിന് ലോക്കല്‍ കമ്മിറ്റി സെക്രട്ടറിയുടെ സഹോദരനടക്കം രണ്ടു സി.പി.എം നേതാക്കളെ സസ്പന്‍ഡ് ചെയ്തു. സംസ്ഥാന കമ്മിറ്റിയുടെ നിര്‍ദേശപ്രകാരം വലിയവിള ലോക്കല്‍ കമ്മിറ്റി അംഗങ്ങളെയാണ് സസ്പന്‍ഡ് ചെയ്തത്.
     ഏതാനും ദിവസം മുമ്പാണ് നടപടിക്ക് കാരണമായ സംഭവം. വലിയവിളയിലെ പള്ളിയില്‍വച്ച് നടന്ന വിവാഹ ചടങ്ങിനിടെയാണിവര്‍ മദ്യപിച്ചത്. വിവാഹ വേദിക്കരികിലിരുന്ന് മദ്യപിക്കുന്നത് വിവാഹത്തിനെത്തിയവര്‍ കണ്ടതോടെയാണ് സംഭവം പുറത്തറിഞ്ഞത്. പ്രാദേശിക നേതാക്കളായ ഇരുവരും മദ്യപാനത്തിന് പിടിയിലായത് നാട്ടില്‍ പാട്ടായി. വൈകാതെ തന്നെ സി.പി.എം സംസ്ഥാന-ജില്ലാ കമ്മിറ്റികള്‍ക്ക് പരാതിയും ലഭിച്ചു. ഇതേതുടര്‍ന്ന് അന്വേഷണം നടത്താനും സംഭവം തെളിഞ്ഞാല്‍ നടപടി സ്വീകരിക്കാനും സംസ്ഥാന കമ്മിറ്റി ജില്ലാ നേതൃത്വത്തിന് നിര്‍ദേശം നല്‍കി. പാളയം ഏരിയാ കമ്മിറ്റിക്കു കീഴിലാണ് വലിയവിള ലോക്കല്‍ കമ്മിറ്റി. നിര്‍ദേശത്തെ തുടര്‍ന്ന് ഏരിയാ കമ്മിറ്റി നടത്തിയ അന്വേഷണത്തില്‍ സംഭവം സത്യമാണെന്ന് ബോധ്യപ്പെട്ടു. തുടര്‍ന്നായിരുന്നു പുറത്താക്കല്‍ നടപടി.