തിരുവനന്തപുരം: മദ്യനയം സംബന്ധിച്ച യു.ഡി.എഫ് നിലപാടിനെതിരേ കെ. മുരളീധരനും രംഗത്ത്. യു.ഡി.എഫിന്റെ മദ്യനയം ശരിയോ തെറ്റോ എന്ന കാര്യത്തില്‍ ഇനി ചര്‍ച്ച വേണ്ടെന്നും ഈ നയം കാരണമാണ് യു.ഡി.എഫിന് ക്ലിഫ് ഹൗസില്‍നിന്ന് കന്റോണ്‍മെന്റ് ഹൗസിലേക്കു മാറേണ്ടിവന്നതെന്നും അദ്ദേഹം പറഞ്ഞു.
ക്ലിഫ് ഹൗസിലിരുന്നാണ് യു.ഡി.എഫ് സര്‍ക്കാര്‍ മദ്യനയം പ്രഖ്യാപിച്ചത്. അതിനു ശേഷം കന്റോണ്‍മെന്റ് ഹൗസിലേക്ക് മാറേണ്ടിവന്നു. മദ്യനയത്തില്‍ ആര്‍.എസ്.പി നേതാവ് ഷിബു ബേബിജോണിന്റെ അഭിപ്രായത്തോട് യോജിക്കുന്നു. പഴയതിനെക്കുറിച്ച് ഇനി ചര്‍ച്ച ചെയ്യേണ്ട. ചത്ത കുട്ടിയുടെ ജാതകം നോക്കിയിട്ട് കാര്യമില്ല. എല്‍.ഡി.എഫ് സര്‍ക്കാരിന്റെ മദ്യനയത്തിനെതിരേ ഇനി ഏതു വിധത്തിലുള്ള സമരമാണ് നടത്തേണ്ടതെന്നാണ് ആലോചിക്കേണ്ടത്. യു.ഡി.എഫ് നടത്തിയ പല സമരങ്ങളും വിജയിച്ചിട്ടില്ല. മറ്റു സമരങ്ങളെപ്പോലെ ഈ സമരം രാമേശ്വരത്തെ ക്ഷൗരം പോലെയാകരുതെന്നും അദ്ദേഹം കൂട്ടിച്ചേര്‍ത്തു.
ഇടതു സര്‍ക്കാരിന്റെ മദ്യനയത്തെ ആര്‍.എസ്.പി നേതാവ് ഷിബു ബേബിജോണും ഐ.എന്‍.ടി.യു.സി സംസ്ഥാന പ്രസിഡന്റ് ആര്‍. ചന്ദ്രശേഖരനും കഴിഞ്ഞ ദിവസം സ്വാഗതം ചെയ്തിരുന്നു. തൊട്ടുപിറകെയാണ് മുരളീധരന്റെയും പ്രതികരണം.
വെള്ളിയാഴ്ച ചേര്‍ന്ന യു.ഡി.എഫ് യോഗത്തില്‍ മദ്യനയം സംബന്ധിച്ച മുന്നണി നിലപാടിനെ സി.എം.പിയും എതിര്‍ത്തിരുന്നു.