കരുനാഗപ്പള്ളി: എക്‌സൈസ് ഷാഡോ ഉദ്യോഗസ്ഥര്‍ നടത്തിയ ഓപ്പറേഷനില്‍ യുവാവ് കഞ്ചാവുമായി അറസ്റ്റില്‍. തേവലക്കര ചക്കാല തെക്കതില്‍ കുട്ടു എന്ന അഫ്‌സല്‍ (22)നെയാണ് സംഘം സ്‌കൂട്ടറില്‍ കഞ്ചാവ് കടത്തുന്നതിനിടയില്‍ പിടികൂടിയത്.

തോട്ടുകര അമ്പലത്തിനു സമീപം വാടകയ്ക്ക് താമസിക്കുന്ന വിദ്യാര്‍ഥി കഞ്ചാവ് കച്ചവടം ചെയ്യുന്നതായ പരാതി ലഭിച്ചതിനെ തുടര്‍ന്ന് എക്‌സൈസ് സംഘം രാഹുലെന്ന യുവാവിനെ കസ്റ്റഡിയില്‍ എടുത്തിരുന്നു.
വിദ്യാര്‍ഥിക്കു കഞ്ചാവ് നല്‍കുന്ന കായംകുളം സ്വദേശികളായ രണ്ടു ബി.ടെക് വിദ്യാര്‍ഥികളെയും കസ്റ്റഡിയില്‍ എടുത്തു. തുടര്‍ന്ന് നടത്തിയ രഹസ്യ ഓപ്പറേഷനിലാണ് കരുനാഗപ്പള്ളി, ചവറ, തേവലക്കര, കോയിവിള, കൊറ്റം കുളങ്ങര ഭാഗങ്ങളില്‍ കഞ്ചാവ് എത്തിച്ചു നല്‍കുന്ന അഫ്‌സലിനെ ഒരു കിലോ കഞ്ചാവുമായി അറസ്റ്റ് ചെയ്തത്.

ഇയാള്‍ വാടകയ്ക്ക് താമസിച്ചിരുന്ന വീട് പരിശോധിച്ചപ്പോള്‍ ഒരു കിലോയോളം കഞ്ചാവും കണ്ടെടുത്തു. കഴിഞ്ഞ മാസം 28ാം തീയതി പാലക്കാട് പോയി രണ്ടര കിലോ കഞ്ചാവ് വാങ്ങിയതില്‍ വിറ്റതിന്റെ ബാക്കി കഞ്ചാവ് ആണ് ഇയാളില്‍ നിന്നും കണ്ടെടുത്തത്. കച്ചവടത്തിന് ഉപയോഗിച്ചിരുന്ന സ്‌കൂട്ടറിന്റെ ഉടമസ്ഥനായ കോയിവിള സ്വദേശിക്കു കഞ്ചാവ് വില്പനയില്‍ ഉള്ള പങ്കു സംബന്ധിച്ച് കൂടുതല്‍ അന്വേഷണം നടക്കും.
നേരത്തെ ഇയാളെക്കുറിച്ച് കഞ്ചാവ്, എം.ഡി.എം.എ എന്നിവയുടെ വില്പനയുള്ളതായ രഹസ്യവിവരം എക്‌സൈസിന് കിട്ടിയിരുന്നു. അഫ്‌സലിന്റെ കച്ചവടത്തിലെ കൂട്ടാളികളെ സംബന്ധിച്ചും വിവരം ലഭിച്ചിട്ടുണ്ട്.