റിയാദ്: ഇസ്താംബൂള്‍ സഊദി കോണ്‍സുലേറ്റില്‍ സംഘര്‍ഷത്തിനിടെ കൊല്ലപ്പെട്ട പ്രശസ്ത മാധ്യമ പ്രവര്‍ത്തകന്‍ ജമാല്‍ ഖശോഗി സംഭവം പുറത്തുവന്ന ശേഷം രാജ്യത്ത് നിന്നും അസ്വാഭാവിക നിലയില്‍ വിദേശത്തേക്ക് പണമൊഴുകിയിട്ടില്ലെന്ന് സഊദി അറേബ്യന്‍ മോണിട്ടറി അതോറിറ്റി (സാമ) ഗവര്‍ണര്‍ അഹ്മദ് അല്‍ഖുലൈഫി പറഞ്ഞു. ഫ്യൂച്ചര്‍ ഇന്‍വെസ്റ്റ്‌മെന്റ് ഇനീഷ്യേറ്റീവിനോടനുബന്ധിച്ച് നല്‍കിയ ടി.വി അഭിമുഖത്തില്‍ സംസാരിക്കുകയായിരുന്നു അദ്ദേഹം.

രണ്ടാഴ്ചക്കിടെ വിദേശത്തേക്കുള്ള പണമൊഴുക്ക് സ്വാഭാവിക നിലയില്‍ തന്നെയായിരുന്നു. വിദേശ നിക്ഷേപകരോ സഊദി വ്യവസായികളോ തങ്ങളുടെ നിക്ഷേപം വിദേശങ്ങളിലേക്ക് കടത്തിയിട്ടില്ല. സമ്പന്ന കുടുംബങ്ങളുടെ ബാങ്ക് അക്കൗണ്ടുകള്‍ക്ക് ഒരുവിധ നിയന്ത്രണവും സഊദിയിലില്ലെന്നും അദ്ദേഹം പറഞ്ഞു. ഈ വര്‍ഷം ആദ്യ പകുതിയില്‍ ബാലന്‍സ് ഓഫ് പെയ്‌മെന്റില്‍ 11,000 കോടി റിയാല്‍ മിച്ചം രേഖപ്പെടുത്തി. ബാങ്കുകളുടെയും ധനകാര്യ സ്ഥാപനങ്ങളുടെയും കിട്ടാക്കടങ്ങള്‍ 1.8 ശതമാനമായി വര്‍ധിച്ചിട്ടുണ്ട്. നിര്‍മാണ മേഖലയിലെ മാന്ദ്യമാണ് ഇതിന് കാരണമെന്നും സാമ ഗവര്‍ണര്‍ പറഞ്ഞു.