കൊടുങ്ങല്ലൂര്‍: എറിയാട് പഞ്ചായത്തില്‍ കടല്‍ മണല്‍ക്കടത്ത് വ്യാപകം. പേബസാര്‍, ലൈറ്റ് ഹൗസ് കടപ്പുറങ്ങളിലാണ് മണല്‍ക്കടത്ത് നടക്കുന്നത്. ശക്തമായ വേലിയേറ്റത്തെ തുടര്‍ന്ന് കടല്‍ഭിത്തി കടന്നെത്തിയ മണലാണ് രാപ്പകല്‍ ഭേദമില്ലാതെ കടത്തുന്നത്.
പ്ലാസ്റ്റിക്ക് ചാക്കുകളില്‍ നിറച്ചും, കുന്നു കൂട്ടിയും വെയ്ക്കുന്ന മണല്‍ പകല്‍ ഇരുചക്രവാഹനങ്ങളിലും, രാത്രി വലിയ വാഹനങ്ങളിലുമാണ് കടത്തുന്നത്.
ഈയിടെ പല തവണയായി ശക്തമായ വേലിയേറ്റമനുഭവപ്പെട്ട ഈ മേഖലയില്‍ കടല്‍ഭിത്തിക്ക് പുറത്തേയ്ക്ക് വന്‍തോതില്‍ മണല്‍ വന്നടിഞ്ഞിരുന്നു. ഈ മണല്‍ അധികൃതരുടെ കണ്ണ് വെട്ടിച്ച് കടത്തുകയാണ്. മണല്‍ കടത്തുന്നത് ചോദ്യം ചെയ്ത് നാട്ടുകാര്‍ രംഗത്ത് വരുന്നുണ്ടെങ്കിലും, അധികൃതരുടെ ഭാഗത്ത് നിന്ന് നടപടിയുണ്ടായിട്ടില്ല. നിയമം മൂലം നിരോധിച്ചിട്ടുള്ള കടല്‍മണല്‍ ഖനനം നടത്തുന്നവര്‍ക്കെതിരേ കര്‍ശന നടപടി സ്വീകരിക്കണമെന്ന ആവശ്യം ശക്തമാണ്.