മുക്കം: വിദ്യാര്‍ഥികള്‍ തമ്മിലുണ്ടായ സംഘര്‍ഷത്തെ തുടര്‍ന്ന് ആളുമാറി പിടിച്ചുകൊണ്ടുപോയി വിദ്യാര്‍ഥിയെ ക്രൂരമായി മര്‍ദിച്ചു. അരീക്കോട് ഇ.ടി.ഐയിലെ രണ്ടാംവര്‍ഷ എ.സി മെക്കാനിക്കല്‍ വിദ്യാര്‍ഥിയായ കാരശ്ശേരി പഞ്ചായത്തിലെ കുമാരനെല്ലൂര്‍ തടപ്പറമ്പ് സ്വദേശി നൂറുദ്ദീനാണു മര്‍ദനമേറ്റത്. മൂന്നു ബൈക്കുകളിലായി എത്തിയ ആറംഗ സംഘമാണു മര്‍ദിച്ചതെന്ന് വിദ്യാര്‍ഥി പറഞ്ഞു.
സാരമായി പരുക്കേറ്റ നൂറുദ്ദീനെ മണാശ്ശേരി കെ.എം.സി.ടി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചയ്ക്ക് 12 ഓടെ കംപസില്‍ നിന്ന് പള്ളിയില്‍ പോകാന്‍ പുറത്തിറങ്ങിയ നൂറുദ്ദീനെ മൂന്നു ബൈക്കുകളിലായി എത്തിയവര്‍ ഒരു കിലോമീറ്ററോളം ദൂരത്തുള്ള താഴത്തങ്ങാടിയിലെ കെട്ടിടത്തില്‍ കൊണ്ടുപോയാണു മര്‍ദിച്ചത്. സൈക്കിള്‍ ചെയിന്‍ ഉള്‍പ്പെടെയുള്ള മാരകായുധങ്ങള്‍ ഉപയോഗിച്ചാണ് മര്‍ദിച്ചതെന്ന് നൂറുദ്ദീന്‍ പറഞ്ഞു.
കഴിഞ്ഞദിവസം കാംപസില്‍ വിദ്യാര്‍ഥികള്‍ തമ്മില്‍ വാക്കുതര്‍ക്കം ഉണ്ടാവുകയും തുടര്‍ന്ന് സംഘര്‍ഷം നടക്കുകയും ചെയ്തിരുന്നു. ഇതിന്റെ തുടര്‍ച്ചയായാണ് ഇന്നലെ ഉണ്ടായ സംഭവമെന്നും എന്നാല്‍ സംഘര്‍ഷം നടക്കുമ്പോള്‍ താന്‍ സ്ഥലത്ത് ഇല്ലായിരുന്നുവെന്നും വിദ്യാര്‍ഥി പറഞ്ഞു. തലയ്ക്കും ശരീരത്തിലെ വിവിധ ഭാഗങ്ങളിലും ഉള്‍പ്പെടെ ഗുരുതരമായി പരിക്കേറ്റിട്ടുണ്ട്. സംഭവത്തില്‍ അരീക്കോട് പൊലിസില്‍ പരാതി നല്‍കി.