മുക്കം: മുക്കത്ത് വീണ്ടും ഓണ്‍ലൈന്‍ തട്ടിപ്പ്. കാരശ്ശേരി പഞ്ചായത്തിലെ ആനയാംകുന്ന് സ്വദേശിയായ കുവപാറമ്മല്‍ ശ്രീനിവാസന്‍ ഓണ്‍ലൈന്‍ വഴി ബുക്ക് ചെയ്ത ഫോണ്‍ കേടുവന്നതിനെ തുടര്‍ന്ന് തിരിച്ചയച്ചപ്പോള്‍ കിട്ടിയത് ഡിറ്റര്‍ജെന്റ് കേക്ക്. അതും മൂന്നു തവണ.
കഴിഞ്ഞ ഡിസംബര്‍ അവസാനവാരത്തിലാണ് ശ്രീനിവാസന്‍ നാപ്‌ടോള്‍ എന്ന ഓണ്‍ലൈന്‍ സൈറ്റില്‍ സൈ്വപ് കമ്പനിയുടെ ആന്‍ഡ്രോയിഡ് ഫോണിനായി 3,499 രൂപ നല്‍കി ബുക്ക് ചെയ്തത്. ജനുവരി ആദ്യവാരം തന്നെ ഫോണ്‍ ലഭിക്കുകയും ചെയ്തു. എന്നാല്‍ ഒരുമാസത്തെ ഉപയോഗത്തിനു മുന്‍പുതന്നെ ഫോണ്‍ കേടായി. ഇതോടെ ഫോണ്‍ തിരിച്ചയക്കാന്‍ ആവശ്യപ്പെട്ടതനുസരിച്ച് തിരിച്ചയച്ചെങ്കിലും ലഭിച്ചത് ഡിറ്റര്‍ജെന്റ് കേക്കായിരുന്നു. ഉടന്‍തന്നെ നാപ്‌ടോളുമായി ബന്ധപ്പെട്ടപ്പോള്‍ അബദ്ധം പറ്റിയതാണെന്നു പറഞ്ഞ് സാധനം തിരിച്ചയക്കാന്‍ ആവശ്യപ്പെടുകയായിരുന്നു. തിരിച്ചയച്ച സാധനം മാറിവന്നപ്പോഴും കവറിലുണ്ടായിരുന്നത് ഡിറ്റര്‍ജെന്റ് കേക്ക് തന്നെ. ഇങ്ങനെ മൂന്നു തവണയാണ് ശ്രീനിവാസന് ഇത്തരത്തില്‍ ഘടി എന്ന കമ്പനിയുടെ പത്തു രൂപ വിലയുള്ള ഡിറ്റര്‍ജെന്റ് കേക്ക് ലഭിച്ചത്. ഇതിനെതിരേ ഉപഭോക്തൃ കോടതിയെ സമീപിക്കാനൊരുങ്ങുകയാണ് ഇദ്ദേഹം.