തിരുവനന്തപുരം: മത്സരം മുടക്കാന്‍ മഴയും നനഞ്ഞ ഗ്രൗണ്ടില്‍ വിക്കറ്റുകള്‍ വലിച്ചെറിയാന്‍ ഇന്ത്യന്‍ താരങ്ങളും മത്സരിച്ചതോടെ ദക്ഷിണാഫ്രിക്കക്കെതിരായ നാലാം ഏകദിനത്തില്‍ ഇന്ത്യ എ ടീമിന് പരാജയം. ദക്ഷിണാഫ്രിക്ക എ നാല് റണ്‍സിനാണ് വിജയിച്ചത്. ശിഖര്‍ ധവാന്റെ അര്‍ധശതകം പാഴായി. മഴമൂലം പാതിവഴിയില്‍ നിര്‍ത്തിയിടത്തുനിന്ന് പുനരാരംഭിച്ച കളിയില്‍ ധവാനും പ്രശാന്ത് ചോപ്രയും ചേര്‍ന്ന് നല്ല തുടക്കം നല്‍കി.

മത്സരം പുനരാരംഭിക്കുമ്പോള്‍ ഇന്ത്യന്‍ സ്‌കോര്‍ 7.4 ഓവറില്‍ ഒരുവിക്കറ്റ് നഷ്ടത്തില്‍ 56 റണ്‍സ്. 17.2 ഓവറില്‍ ജയിക്കാന്‍ വേണ്ടത് 137 റണ്‍സ്. നനഞ്ഞ പിച്ചില്‍ ആത്മവിശ്വാസത്തോടെ ധവാനും ചോപ്രയും ബാറ്റ് വീശി. രണ്ട് സിക്‌സറുള്‍പ്പെടെ 26 റണ്‍സടിച്ച ചോപ്രയെ 12-ാം ഓവറിലെ രണ്ടാം പന്തില്‍ ലുത്വോ സിംപാല എന്റിച്ച് നോര്‍ദേയുടെ കൈകളില്‍ എത്തിച്ചു. ധവാന് കൂട്ടായെത്തിയത് നായകന്‍ ശ്രേയസ് അയ്യര്‍. എന്നാല്‍ അര്‍ധശതകം തികച്ച ധവാന്റെ ആഹ്ലാദത്തിന് ആയുസുണ്ടായില്ല. പതിനാലാം ഓവറിലെ അവസാന പന്തില്‍ മാക്രോ ജാസന്റെ പന്തില്‍ ധവാന് പിഴച്ചു. കീപ്പര്‍ ക്വാഷ്‌ലെയ്ക്ക് ക്യാച്ച്. എട്ട് ഫോറുള്‍പ്പെടെ 43 പന്തില്‍നിന്ന് 52 റണ്‍സാണ് ധവാന്‍ അടിച്ചത്.
ആരാധകരുടെ ആരവങ്ങളുടെ അകമ്പടിയോടെ സഞ്ജു സാംസണ്‍ എത്തി. അതേ ഓവറില്‍ വീണ്ടും ഇന്ത്യക്ക് നിരാശ. അവസാന ഓവര്‍ ആരംഭിക്കുമ്പോള്‍ ഇന്ത്യയുടെ സ്‌കോര്‍ 178. ജയിക്കാന്‍ വേണ്ടത് 15. ഹെന്‍ട്രിക്‌സിന്റെ ആദ്യ പന്ത് ചഹാര്‍ ബൗണ്ടറി കടത്തി. രണ്ടാം പന്തില്‍ രണ്ടുറണ്‍. മൂന്നാമത്തേതില്‍ സിംഗിള്‍. നാലാം പന്തില്‍ ബാറ്റില്‍ തട്ടിയില്ലെങ്കിലും ഇഷാന്‍ ഓടി, ഒരുറണ്‍. അഞ്ചാം പന്തില്‍ രാഹുല്‍ ചഹാര്‍ വക രണ്ടുറന്‍സ്.

അവസാന പന്തില്‍ ഒന്നും സംഭവിച്ചില്ല, ഇഷാന്‍ കാഴ്ചക്കാരനായി. ഇന്ത്യ തീര്‍ന്നു.
അഞ്ച് ഓവറില്‍ 36 റണ്‍സ് വഴങ്ങി മൂന്ന് വിക്കറ്റെടുത്ത ദക്ഷിണാഫ്രിക്കയുടെ ആന്‍ഡ്രിച്ച് നോര്‍ജെയാണ് കളിയിലെ താരം.