ഇരിക്കൂര്‍: പടിയൂരില്‍ വെടിമരുന്നു ശേഖരവും ബോംബുനിര്‍മാണ സാമഗ്രികളും ഇരിക്കൂര്‍ പൊലിസ് നാട്ടുകാരുടെ സഹായത്തോടെ പിടികൂടി. തിരുവനന്തപുരം സ്വദേശികളായ ബിജു(39), ബിജു(38) എന്നിവരാണ് പിടിയിലായത്. വീട്ടുടമയായ കളപ്പുരയില്‍ ജയന്‍ (49) ഓടി രക്ഷപ്പെട്ടു. പുലിക്കാട് വാടക വീട്ടില്‍വച്ച് വന്‍ സ്‌ഫോടന ശബ്ദംകേട്ട് നാട്ടുകാര്‍ ഓടിയെത്തിയപ്പോഴാണ് സ്‌ഫോടകവസ്തു ശേഖരം കണ്ടെത്തിയത്.
ഇതേസ്ഥലത്ത് ബോംബ് പൊട്ടി നായ തല തകര്‍ന്ന് ചത്ത നിലയിലും കാണപ്പെട്ടു. കാട്ടുപന്നിയെ കൊല്ലുന്നതിനായി ബോംബുനിര്‍മിക്കുന്നതിനിടെയാണ് സ്‌ഫോടനമുണ്ടായതെന്നാണ് കരുതുന്നത്. കഴിഞ്ഞ ദിവസം അയ്യംകുന്ന് കച്ചേരിക്കടവില്‍ തോട്ടനിര്‍മാണത്തിനിടെയുണ്ടായ സ്‌ഫോടനത്തില്‍ 50 കാരന്‍ കൊല്ലപ്പെട്ടിരുന്നു.