ദുണ്ടീ (സ്‌കോട്ട്‌ലന്‍ഡ്): ലോകക്രിക്കറ്റില്‍ ചരിത്രം കുറിച്ച് തായ്‌ലന്‍ഡ് വനിതാ ടീം. 2020ലെ ടി20 വനിതാ ലോകകപ്പിലേക്ക് യോഗ്യത നേടിയാണ് വനിതകള്‍ പുതുചരിത്രം രചിച്ചത്. പുരുഷ ടീം ലോകകപ്പ് കളിക്കും മുമ്പ് വനിതകള്‍ ലോകകപ്പിന് യോഗ്യത നേടിയ ആദ്യ രാജ്യമെന്ന നേട്ടമാണ് തായ്‌ലന്‍ഡ് സ്വന്തമാക്കിയിരിക്കുന്നത്. സ്‌കോട്ട്‌ലന്‍ഡില്‍ നടന്ന ടി20 ലോകകപ്പ് യോഗ്യതാ റൗണ്ട് സെമിഫൈനലില്‍ പാപ്പുവ ന്യൂഗിനിയയെ എട്ടുവിക്കറ്റിന് തകര്‍ത്താണ് അവര്‍ അടുത്തവര്‍ഷം ആസ്‌ത്രേലിയയില്‍ നടക്കുന്ന ടൂര്‍ണമെന്റിലേക്ക് എത്തുന്നത്. മറ്റൊരു സെമിഫൈനലില്‍ അയര്‍ലന്‍ഡിനെ നാലു വിക്കറ്റിന് തകര്‍ത്ത് ബംഗ്ലാദേശും യോഗ്യത നേടി. തുടര്‍ച്ചയായി 21 അന്താരാഷ്ട്ര മത്സരങ്ങള്‍ ജയിച്ചാണ് തായ്‌ലന്‍ഡ് വരുന്നത്. ഇത് വനിതാ ക്രിക്കറ്റിലെ റെക്കോര്‍ഡാണ്. മത്സരത്തില്‍ ആദ്യം ബാറ്റ് ചെയ്ത പാപ്പുവ ന്യൂ ഗിനിയ 20 ഓവറില്‍ ഏഴിന് 67 റണ്‍സെടുത്തപ്പോള്‍ മറുപടിക്കിറങ്ങിയ തായ്‌ലന്റ് 17.3 ഓവറില്‍ രണ്ട് വിക്കറ്റ് മാത്രം നഷ്ടപ്പെടുത്തി ജയം സ്വന്തമാക്കി.
ടോസ് നേടി ബാറ്റിങ് തിരഞ്ഞെടുത്ത അയര്‍ലന്‍ഡിന് 20 ഓവറില്‍ വെറും 85 റണ്‍സ് മാത്രമാണ് എടുക്കാന്‍ കഴിഞ്ഞത്. മറുപടി ബാറ്റിങിനിറങ്ങിയ ബംഗ്ലാദേശ് 18.3 ഓവറില്‍ ആറു വിക്കറ്റ് നഷ്ടത്തില്‍ ലക്ഷ്യം കണ്ടു.
ആസ്‌ത്രേലിയ, ഇംഗ്ലണ്ട്, ഇന്ത്യ, ന്യൂസിലന്‍ഡ്, പാകിസ്താന്‍, ദക്ഷിണാഫ്രിക്ക, ശ്രീലങ്ക, വെസ്റ്റ് ഇന്‍ഡീസ് എന്നീ ടീമുകളോടാപ്പം ഇവര്‍ കളിക്കും.