കാട്ടാക്കട: മാറനല്ലൂര്‍ പഞ്ചായത്ത് ഓഫിസ് വരാന്തയില്‍ എന്‍.ജി.ഒ യൂനിയന്റെ ആഭിമുഖ്യത്തില്‍ ഓഫിസ് സമയത്ത് വിശദീകരണ യോഗം. ബി.ജെ.പി പ്രവര്‍ത്തകര്‍ ഓഫിസിലെ മെയിന്‍ഗേറ്റ് താഴിട്ട് പൂട്ടി. വിവരമറിഞ്ഞെത്തിയ സി.പി.എം പ്രവര്‍ത്തകര്‍ മാറനല്ലൂര്‍ പൊലിസിന്റെ സാന്നിധ്യത്തില്‍ പൂട്ട് തകര്‍ത്ത് ഓഫിസ് തുറന്നുകൊടുത്തു.
ഇന്നലെ രാവിലെ 11 മണിയോടെ ആയിരുന്നു സംഭവങ്ങള്‍ക്ക് തുടക്കം. എന്‍.ജി.ഒ യൂനിയന്റെ മാറനല്ലൂര്‍ ബ്രാഞ്ചിലെ അംഗങ്ങളെ പഞ്ചായത്ത് ഓഫിസ് വരാന്തയില്‍ വിളിച്ച് ചേര്‍ത്ത് ഉണര്‍വ് എന്ന ബോധവല്‍ക്കരണ ക്ലാസ് സംഘടിപ്പിച്ചു.
ശബരിമലയിലെ യുവതീ പ്രവേശനവുമായി ബന്ധപ്പെട്ട് സര്‍ക്കാരിന്റെ നിലപാടുകള്‍ക്ക് പിന്തുണ സമാഹരിക്കുന്നതിന്റെ ഭാഗമായി യൂനിയന്‍ നേതാക്കള്‍ നടത്തിയ പ്രസംഗമാണ് നടന്നത്. ഇതാണ് തടഞ്ഞതെന്ന് ബി.ജെ.പി പാര്‍ലമെന്ററി ലീഡര്‍ തൂങ്ങാമ്പാറ ബാലകൃഷ്ണന്‍ പറഞ്ഞു. യോഗം ഉച്ചവരെ നീണ്ടതോടെ ബി.ജെ.പി പ്രവര്‍ത്തകര്‍ പഞ്ചായത്ത് ഓഫിസിന്റെ പ്രധാന വാതിലിലെ ഗ്രില്‍ വലിച്ചടച്ച് താഴിട്ട് പൂട്ടി. രണ്ട് ജീവനക്കാരും പഞ്ചായത്ത് പ്രസിഡന്റ് എസ്. രമയും ഓഫിസിനുള്ളിലായിരുന്നു. വിവരമറിഞ്ഞ സി.പി.എം പ്രവര്‍ത്തകര്‍ ലോക്കല്‍ സെക്രട്ടറി കെ. സുരേഷിന്റെ നേതൃത്വത്തില്‍ മാറനല്ലൂര്‍ പൊലിസിനെ വിവരം ധരിപ്പിച്ചു. പൊലിസിന്റെ സാന്നിധ്യത്തില്‍ പൂട്ട് തല്ലിപ്പൊളിച്ച് ഓഫിസ് തുറന്ന് നല്‍കി. ഇതോടെ സമ്മേളനം അവസാനിപ്പിക്കുകയും ചെയ്തു. സംഘടനാ സ്വാതന്ത്ര്യത്തിന്റെ ഭാഗമായാണ് യോഗം ചേര്‍ന്നതെന്നാണ് സി.പി.എം വിശദീകരണം.
സംഘടനാ സ്വാതന്ത്ര്യമല്ല, ശബരിമല വിഷയത്തില്‍ പാര്‍ട്ടിയോട് അകന്ന അണികളെ തിരികെ കൂട്ടാനുള്ള നുണപറയല്‍ യോഗമായിരുന്നെന്ന് പ്രതിപക്ഷം ആരോപിച്ചു. പഞ്ചായത്ത് ഓഫിസില്‍ ഉണ്ടായ സംഭവങ്ങളുടെ പേരില്‍ ആരും പരാതി നല്‍കിയിട്ടില്ലെന്ന് മാറനല്ലൂര്‍ എസ്.ഐ ആര്‍. സജീവ് പറഞ്ഞു.