ന്യൂയോര്‍ക്ക്: വനിതകളില്‍ 24ാം ഗ്രാന്‍ഡ്സ്ലാം കിരീടങ്ങള്‍ ചൂടിയ ഇതിഹാസതാരം മാര്‍ഗരറ്റ് സ്മിത്തിന്റെ റെക്കോര്‍ഡിനൊപ്പമെത്താന്‍ സെറീനയ്ക്കിനി ഒരു മത്സരത്തിന്റെ ദൂരം മാത്രം. ഇന്നലെ നടന്ന യു.എസ് ഓപ്പണ്‍ വനിതാ സെമിയില്‍ യുക്രൈന്റെ എലീന സ്വിറ്റോളിനയെ പരാജയപ്പെടുത്തിയ സെറീന ഫൈനലിലേക്ക് മുന്നേറിയതോടെയാണിത്. നേരിട്ടുള്ള സെറ്റുകള്‍ക്കായിരുന്നു സെറീനയുടെ വിജയം. സ്‌കോര്‍ 6-3, 6-1.

ഒരു മണിക്കൂറും 11 മിനുട്ടും നീണ്ട പോരാട്ടത്തിനൊടുവിലാണ് മുന്‍ ലോക ഒന്നാം നമ്പര്‍ താരവും നിലവിലെ എട്ടാം നമ്പര്‍ താരവുമായ സെറീന നിലവിലെ അഞ്ചാം നമ്പര്‍ താരമായ സ്വിറ്റോളിനയെ മുട്ടുകുത്തിച്ചത്. താരത്തിന്റെ 33ാം ഗ്രാന്‍ഡ്സ്ലാം ഫൈനലാണിത്. ഈ ജയത്തോടെ മറ്റൊരു ടെന്നിസ് ഇതിഹാസം ക്രിസ് ഇവര്‍ട്ടിന്റെ 101 യു.എസ് ഓപ്പണ്‍ വിജയത്തിനൊപ്പമെത്താനും താരത്തിനായി.
ഫൈനലില്‍ കാനഡയുടെ നിലവിലെ ലോക 15ാം നമ്പര്‍ താരവും 19കാരിയുമായ ബിയാന്‍ക ആന്‍ഡ്രീസ്‌കുവാണ് സെറീനയെ കാത്തിരിക്കുന്നത്. മറ്റൊരു സെമിയില്‍ ലോക 12ാം നമ്പര്‍ താരം ബെലിന്‍ഡ ബെന്‍സിച്ചിനെ നേരിട്ടുള്ള സെറ്റുകള്‍ക്കാണ് ബിയാന്‍ക പരാജയപ്പെടുത്തിയത്.