മഞ്ചേരി: എ.ഐ.പി (ഏരിയ ഇന്റന്‍സീവ് പ്രോഗ്രാം)യില്‍ ഉള്‍പ്പെട്ട സ്‌കൂളുകളിലെ അധ്യാപകര്‍ക്ക് ശമ്പളം നല്‍കുന്നതിനു കഴിഞ്ഞ യു.ഡി.എഫ് സര്‍ക്കാര്‍ നടപ്പിലാക്കിയ ഉത്തരവ് ഇനിയും നടപ്പിലായില്ല. 1995ലാണ് പിന്നോക്ക ജനവിഭാഗങ്ങളുടെ വിദ്യാഭ്യാസ പുരോഗതിക്കുവേണ്ടി സ്‌കൂളുകളില്‍ ഈ പദ്ധതി നടപ്പിലാക്കിയത്. സംസ്ഥാനത്ത് മലപ്പുറം, പാലക്കാട്, കോഴിക്കോട്, വയനാട് തുടങ്ങിയ ജില്ലകളിലായി 33 സ്‌കൂളുകളാണ് ഇത്തരത്തില്‍ പ്രവര്‍ത്തിക്കുന്നത്. മറ്റു സംസ്ഥാനങ്ങളില്‍ മികച്ച രീതിയില്‍ പദ്ധതി നടപ്പിലാകുമ്പോഴാണ് ഇത്തരം സ്ഥാപനങ്ങളിലെ അധ്യാപകരുടെ ശമ്പളം തടഞ്ഞുവയ്ക്കുന്ന തരത്തിലുള്ള നടപടികളുമായി സംസ്ഥാന സര്‍ക്കാര്‍ മുന്നോട്ടുപോവുന്നത്.

1995ല്‍ നിയമിച്ച 238 അധ്യാപകര്‍ക്ക് മറ്റു എയ്ഡഡ് സ്‌കൂളുകളില്‍ നല്‍കുന്ന ശമ്പളവും മറ്റു ആനുകൂല്യങ്ങളും ലഭിക്കുന്നുണ്ടെങ്കിലും 2003 മുതല്‍ നിയമിതരായ 73 അധ്യാപകര്‍ക്ക് അകാരണമായി ശമ്പളം തടഞ്ഞുവെച്ചിരിക്കുകയാണ്. ഉത്തരവ് നടപ്പിലാക്കാന്‍ ഇലക്ഷന്‍ കമ്മിഷന്‍ പോലും സര്‍ക്കാരിനോട് ആവശ്യപ്പെട്ടതാണ്.എന്നാല്‍ ഉദ്യോഗസ്ഥ വിഭാഗങ്ങളുടെ സങ്കുചിത മനോഭാവങ്ങളാണ് ഉത്തരവു നടപ്പിലാക്കാന്‍ കാലതാമസമെടുക്കുന്നതെന്ന വിമര്‍ശനമാണ് ഉയര്‍ന്നിരിക്കുന്നത്. ന്യൂനപക്ഷ അവകാശങ്ങള്‍ നടപ്പിലാക്കുന്ന വിഷയങ്ങളില്‍ മാറി മാറിവരുന്ന സര്‍ക്കാരുകള്‍ക്ക് ഒട്ടും താല്‍പര്യമില്ല എന്നതിന്റെ കൂടി തെളിവാവുകയാണ് എഐ.പി തലത്തിലെ അധ്യാപക വിഭാഗത്തോടുള്ള ഇത്തരം നിലപാടുകള്‍ എന്നും വിലയിരുത്തുന്നുണ്ട് . പുതിയ സര്‍ക്കാര്‍ അധികാരത്തില്‍ വന്നതിനു ശേഷവും ഉത്തരവ് യുദ്ധകാലാടിസ്ഥാനത്തില്‍ നടപ്പിലാക്കണം എന്നാവശ്യപ്പെട്ട് വിദ്യാഭ്യാസ മന്ത്രിക്കു നിവേദനം നല്‍കിയിരുന്നു. എന്നിട്ടും ചുവപ്പുനാടയില്‍ കുടുങ്ങിയ ഉത്തരവു നടപ്പില്‍ വരാത്തതു ന്യൂനപക്ഷ വിഭാഗങ്ങളോടുള്ള അവഗണനയാണെന്നു വിലയിരുത്തുന്നു.

ന്യൂനപക്ഷ സംഘടനകള്‍ നടത്തുന്ന വിദ്യാഭ്യാസ സ്ഥാപനങ്ങളില്‍ ഇത്തരം നടപടികള്‍കെതിരേ അമര്‍ഷം പുകയുന്നുണ്ട്. മത-രാഷ്ട്രീയ- സര്‍വിസ് സംഘടനകള്‍ ഒന്നിച്ചു വകുപ്പു മന്ത്രിയെ കണ്ടു കാര്യങ്ങളുടെ നിജസ്ഥിതി ബോധ്യപ്പെടുത്തിയിട്ടും ഉത്തരവ് നടപ്പാക്കുന്നതില്‍ അനാസ്ഥ തുടരുകയാണ്.