അമ്പലപ്പുഴ: വിദേശ മദ്യ വില്‍പനശാലയ്‌ക്കെതിരേ നടത്തുന്ന സമരത്തിന്റെ ഭാഗമായി റോഡ് ഉപരോധിച്ചു. പുന്നപ്ര തെക്ക് പഞ്ചായത്ത് ഏഴാം വാര്‍ഡില്‍ പ്രവര്‍ത്തിക്കുന്ന വിദേശ മദ്യശാല നീക്കം ചെയ്യണമെന്നാവശ്യപ്പെട്ട് ജനകീയ സമരസമിതി നടത്തിവന്ന സമരം ഒരു മാസം പിന്നിട്ടിട്ടും മദ്യശാല നീക്കം ചെയ്യാന്‍ അധികാരികള്‍ തയാറാകാത്തതില്‍ പ്രതിഷേധിച്ചാണ് സമരസമിതി പുന്നപ്ര കളിത്തട്ട് വെട്ടിക്കരി റോഡ് ഉപരോധിച്ചത്.
ഉപരോധത്തെ തുടര്‍ന്ന് ഒരു മണിക്കൂറോളം ഗതാഗതം തടസപ്പെട്ടു. ഇതിനിടയില്‍ വഴികൊടുത്തില്ലെന്നാരോപിച്ച് മദ്യം വാങ്ങാനെത്തിയവരും സമരക്കാരും തമ്മില്‍ വാക്കേറ്റം ഉണ്ടാവുകയും പുന്നപ്ര പൊലിസെത്തി സമരക്കാരെ പിന്തിരിപ്പിക്കുകയുമായിരുന്നു.