ചേലേമ്പ്ര (മലപ്പുറം): സുബ്രതോ പാര്‍ക്ക് സ്റ്റേഡിയത്തില്‍ നടന്ന ആണ്‍കുട്ടികളുടെ അണ്ടര്‍ 17 ഫുട്‌ബോള്‍ ആദ്യ മത്സരത്തില്‍ കേരളത്തെ പ്രതിനിധീകരിക്കുന്ന ചേലേമ്പ്ര എന്‍.എന്‍.എം.എച്ച്.എസ്.എസ് കരുത്തരായ മിസോറമിനെ ഗോള്‍രഹിത സമനിലയില്‍ തളച്ചു. തുല്യ ശക്തികള്‍ തമ്മിലുള്ള മത്സരത്തില്‍ കേരള ടീമിനായിരുന്നു മുന്‍തൂക്കം.
ആദ്യ പകുതിയില്‍ ഇരു ടീമുകള്‍ക്കും തുല്യ അവസരങ്ങള്‍ ലഭിച്ചിരുന്നു. രണ്ടാം പകുതിയില്‍ ഗോളെന്നുറച്ച രണ്ട് അവസരങ്ങള്‍ കേരളം പാഴാക്കി. ഇതോടെ ലീഗ് റൗണ്ടിലെ അടുത്ത മത്സരങ്ങള്‍ നിര്‍ണായകമായി. ഇന്ന് ഇന്റര്‍നാഷനല്‍ ബോര്‍ഡ് സ്‌കൂള്‍ ഓര്‍ഗനൈസേഷന്‍ (ഐ.ബി.എസ്.ഒ) ടീമുമായി പാത്ത് വേയ്‌സ് ഗ്രൗണ്ടില്‍ ടീം രണ്ടാം മത്സരത്തിനായി ഇറങ്ങും.