മനാമ: മാസങ്ങളായി ശമ്പളം മുടങ്ങിയ ബഹ്‌റൈനിലെ ജി.പി സെഡ് കമ്പനിയിലെ തൊഴിലാളികളുടെ പ്രശ്‌നത്തില്‍ ബഹ്‌റൈന്‍ പ്രധാനമന്ത്രി പരിഹാര നടപടികള്‍ ആരംഭിച്ചു. ഇതോടെ തൊഴിലാളികളുടെ മാസങ്ങളായി തുടരുന്ന ദുരിതത്തിന് ആശ്വാസമാകുമെന്നാണ് പ്രതീക്ഷ. മുന്‍പ് പലപ്പോഴായി തൊഴിലാളികള്‍ തൊഴില്‍ മന്ത്രാലവുമായും കമ്പനി അധികൃതരുമായും ബന്ധപ്പെട്ട് പ്രശ്‌നപരിഹാരത്തിനാവശ്യപ്പെട്ടിരുന്നെങ്കിലും കഴിഞ്ഞിരുന്നില്ല. ഇതേ തുടര്‍ന്ന് കഴിഞ്ഞ ദിവസം തൊഴിലാളികള്‍ സംഘടിച്ച് പ്രതിഷേധവുമായി തെരുവിലിറങ്ങിയിരുന്നു. തുടര്‍ന്നാണ് പ്രശ്‌നത്തില്‍ പ്രധാനമന്ത്രിയുടെ ഓഫിസ് ഇടപെട്ട് അടിയന്തര പരിഹാര നടപടികള്‍ ആരംഭിച്ചിരിക്കുന്നത്.
നിലവില്‍ കമ്പനിയില്‍ 300ഓളം തൊഴിലാളികള്‍ക്ക് ശമ്പള കുടിശ്ശിക ലഭിക്കാനുണ്ടെന്ന് പ്രാദേശിക പത്രം റിപ്പോര്‍ട്ട് ചെയ്തിരുന്നു. 80 പേരാണ് അല്‍ ഇസ്തിഖ്‌ലാല്‍ ഹൈവെയില്‍ സംഘടിച്ചിറങ്ങിയത്. കഴിഞ്ഞ അഞ്ചുമാസമായി തങ്ങള്‍ക്ക് ശമ്പളം ലഭിച്ചില്ലെന്ന് തൊഴിലാളികള്‍ ആരോപിച്ചു. ഇതിനിടെ ഇന്ത്യന്‍ എംബസി ഉദ്യോഗസ്ഥരും സാമൂഹിക പ്രവര്‍ത്തകരും സ്ഥലത്തെത്തി തൊഴിലാളികളുമായി സംസാരിച്ചിരുന്നു.
തൊഴിലാളികളുടെ പ്രശ്‌നം ഉടന്‍ പരിഹരിക്കാന്‍ തൊഴില്‍, സാമൂഹിക വികസന മന്ത്രാലയം നടപടി സ്വീകരിക്കണമെന്ന് പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ ഖലീഫ ഉത്തരവിടുകയായിരുന്നു.