തിരുവനന്തപുരം: നിയമം അനുസരിച്ച് ജോലി ചെയ്യുന്ന പൊലിസ് ഉദ്യോഗസ്ഥരെ മതത്തിന്റെയും വിശ്വാസത്തിന്റെയും പേരില്‍ സമൂഹ മാധ്യമങ്ങളിലൂടെ അവഹേളിക്കരുതെന്ന് മുഖ്യമന്ത്രി പിണറായി വിജയന്‍.
പൊലിസ് ഉദ്യോഗസ്ഥരെ സമൂഹ മാധ്യമങ്ങളില്‍ അവഹേളിക്കുന്നവരെ നിയമത്തിനുമുന്നില്‍ കൊണ്ടുവരാന്‍ കര്‍ശനടപടി സ്വീകരിക്കും.
സ്‌പെഷല്‍ ആംഡ് പൊലിസിന്റെ ഇരുപതാമത് ബാച്ചിന്റെ പാസിങ് ഔട്ട് പരേഡില്‍ അഭിവാദ്യം സ്വീകരിച്ച് പേരൂര്‍ക്കട എസ്.എ.പി ഗ്രൗണ്ടില്‍ സംസാരിക്കുകയായിരുന്നു അദ്ദേഹം.
നിയമപരമായി ചെയ്യേണ്ട ഉത്തരവാദിത്തം നിര്‍വഹിക്കാന്‍ പൊലിസ് ബാധ്യസ്ഥരാണ്. മതവും വിശ്വാസവും പരിഗണിച്ചല്ല അവര്‍ ജോലി നിര്‍വഹിക്കുന്നത്. അത്തരം ഭീഷണിക്കും സ്വാധീനത്തിനും വഴങ്ങുന്ന ഒരാളും സംസ്ഥാന പൊലിസില്‍ ഇല്ല. പരിശീലനത്തില്‍ ലഭിച്ച അറിവുകള്‍ പ്രായോഗിക ബുദ്ധിയുടെ പിന്തുണയോടെ പ്രവൃത്തിപഥത്തില്‍ എത്തിക്കണം. ജനാധിപത്യ സമൂഹത്തിന് അനുഗുണമായി പൊലിസിനെ പരിവര്‍ത്തനം ചെയ്യുന്ന രീതിയിലാണ് മുന്നോട്ടുപോകുന്നത്.
പൊതുജനം പൊലിസില്‍നിന്ന് പ്രതീക്ഷിക്കുന്നത് സംസ്‌കാര സമ്പന്നമായ പെരുമാറ്റമാണ്.
അതിനുസരിച്ചുള്ള കാലാനുസൃത പരിശീലനം നല്‍കുകയാണ് സര്‍ക്കാര്‍ ലക്ഷ്യം.
ഉന്നത വിദ്യാഭ്യാസമുള്ള ഒട്ടേറെപ്പേര്‍ പൊലിസ് സേനയിലേക്ക് കടന്നുവരുന്നുണ്ട്.
അവര്‍ ആര്‍ജിച്ച വിദ്യാഭ്യാസവും കഴിവും എങ്ങനെ വകുപ്പിനായി ഉപയോഗിക്കാം എന്നു സമഗ്രമായി പരിശോധിക്കുന്നുണ്ട്.
പൊലിസ് സര്‍ക്കാരിന്റെ മുഖമായതിനാല്‍ നല്ല വിദ്യഭാഭ്യാസം ഉള്ളവരുടെ കടന്നുവരവ് മുഖച്ഛായ മെച്ചപ്പെടുത്തുമെന്നും മുഖ്യമന്ത്രി പറഞ്ഞു.
പരിശീലന കാലഘട്ടത്തില്‍ വിവിധ മേഖലകളില്‍ മികവ് തെളിയിച്ചവര്‍ക്കുള്ള ട്രോഫിയും മുഖ്യമന്ത്രി വിതരണം ചെയ്തു.