ന്യൂഡല്‍ഹി: രണ്ടാം മോദിസര്‍ക്കാരിന്റെ ആദ്യനൂറുദിനങ്ങള്‍ പ്രതീക്ഷിച്ചതിലധികം നേട്ടം കൈവരിച്ചതായി കേന്ദ്രമന്ത്രി പ്രകാശ് ജാവ്‌ദേകര്‍. ഇതുവരെ ഉണ്ടാകാത്തവിധം അപ്രതീക്ഷിത തീരുമാനങ്ങള്‍ നിറഞ്ഞതായിരുന്നു 100ദിനങ്ങള്‍. ജമ്മുകശ്മിരിന്റെ പ്രത്യേക പദവി റദ്ദാക്കല്‍ അതില്‍ പ്രധാനമാണ്, രണ്ടാം മോദിസര്‍ക്കാര്‍ നൂറുദിവസം പൂര്‍ത്തിയാക്കിയതിനോടനുബന്ധിച്ച് നടത്തിയ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം. 100ദിവസങ്ങള്‍ പൂര്‍ത്തിയാക്കുന്നതിന്റെ ഭാഗമായി പുറത്തിറക്കുന്ന 'ഹണ്‍ഡ്രഡ് ഡെയ്‌സ് ഓഫ് ബോള്‍ഡ് ഇനിഷ്യേറ്റീവ്‌സ് ആന്‍ഡ് ഡിസിസീവ് ആക്ഷന്‍സ്' എന്ന പത്രികയുടെ പ്രകാശനവും നിര്‍വഹിച്ചു.

അതേസമയം, കേന്ദ്രമന്ത്രിയുടെ പ്രസ്താവനയ്ക്ക് മറുപടിയുമായി കോണ്‍ഗ്രസ് നേതാവ് രാഹുല്‍ഗാന്ധിയുടെ ട്വീറ്റ് .100ദിനങ്ങളില്‍ ഒരുതരത്തിലുമുള്ള നേട്ടങ്ങള്‍ കൈവരിച്ചിട്ടില്ലെന്നും കേന്ദ്രമന്ത്രി പ്രകാശ് ജാവ്‌ദേകറുടെ വാക്കുകളെ പരിഹസിച്ചുകൊണ്ട് കോണ്‍ഗ്രസ് നേതാവ് രാഹുല്‍ഗാന്ധി ട്വീറ്റുചെയ്തു. ജനാധിപത്യത്തെ തുടര്‍ച്ചയായി അട്ടിമറിക്കുക, സമ്പത്‌വ്യവസ്ഥയുടെ മാന്ദ്യം, ആള്‍ക്കൂട്ട അക്രമങ്ങള്‍ എന്നിവയെയും ചൂണ്ടിക്കാട്ടി രാഹുല്‍ഗാന്ധി ട്വീറ്റുചെയ്തു.