ഓമശ്ശേരി: തെച്ച്യാട്, തറോല്‍ പ്രദേശത്ത് തെരുവുനായ ശല്യം രൂക്ഷമാകുന്നു. കോഴി, പശു, ആട് തുടങ്ങിയ വളര്‍ത്തുമൃഗങ്ങളെ പേപ്പട്ടികള്‍ ആക്രമിക്കുന്നത് നിത്യമായിരിക്കുകയാണ്. കഴിഞ്ഞദിവസം തറോല്‍ റഹീമിന്റെ ആടിനെ തെരുവുനായകള്‍ ചേര്‍ന്ന് കടിച്ചുകൊന്നിരുന്നു. അലക്ഷ്യമായി നടക്കുന്ന നായകള്‍ സ്‌കൂള്‍ കുട്ടികളടക്കമുള്ള നാട്ടുകാര്‍ക്ക് കടുത്ത ഭീഷണിയാണ് ഉയര്‍ത്തുന്നത്.
കാല്‍നട യാത്രക്കാരെ നിരവധി തവണ തെരുവുനായ്ക്കള്‍ ആക്രമിച്ചതിനാല്‍ ഭീതിയോടെയാണ് ജനങ്ങള്‍ ഇതുവഴി സഞ്ചരിക്കുന്നത്. രാത്രികാലങ്ങളില്‍ വാഹനയാത്രക്കാരടക്കമുള്ളവരെ നായകള്‍ ആക്രമിക്കുന്നതും പതിവാണ്. തെരുവുനായ ശല്യത്തെക്കുറിച്ച് നിരവധി തവണ വാര്‍ഡ് കൗണ്‍സിലറുടെ ശ്രദ്ധയില്‍പ്പെടുത്തിയിട്ടും നടപടി ഉണ്ടായിട്ടില്ലെന്ന് നാട്ടുകാര്‍ പറഞ്ഞു.