ബെംഗ്ലൂരു: ചന്ദ്രയാന്‍2 ന്റെ വിക്രം ലാന്‍ഡര്‍ ചന്ദ്രോപരിതലത്തില്‍ കണ്ടെത്തിയെന്ന് ഐ.എസ്.ആര്‍.ഒ ചെയര്‍മാന്‍ കെ. ശിവന്‍ . ലാന്‍ഡറിന്റെ സ്ഥാനം കണ്ടെത്തിയെങ്കിലും അതുമായുള്ള ആശയ വിനിമയം സാധ്യമായിട്ടില്ലെന്നും ഐ.എസ്.ആര്‍.ഒ ചെയര്‍മാനെ ഉദ്ധരിച്ച് എ.എന്‍.ഐ റിപ്പോര്‍ട്ട് ചെയ്തു. ഓര്‍ബിറ്റര്‍ അതിന്റെ തെര്‍മല്‍ ഇമേജ് പകര്‍ത്തിയിട്ടുണ്ട്.

ചന്ദ്രയാന്‍ രണ്ട് ഓര്‍ബിറ്റര്‍ ഇപ്പോഴും ചന്ദ്രന് ചുറ്റും കറങ്ങുന്നുണ്ട്. വിക്രം എന്നു വിളിക്കപ്പെടുന്ന ലാന്‍ഡറിന്റെ തെര്‍മല്‍ ഇമേജ് മാത്രമാണ് ഓര്‍ബിറ്റര്‍ ഭൂമിയിലേക്ക് അയച്ചിട്ടുള്ളത്. എന്നാല്‍ വിക്രം ലാന്‍ഡറിന്റെ കൃത്യമായ സ്ഥാനം ഇസ്‌റോ പുറത്ത് വിട്ടില്ല. ഓര്‍ബിറ്റര്‍ ദക്ഷിണ ധ്രുവ പ്രദേശത്ത് എത്തിയാല്‍ മാത്രമേ കൂടുതല്‍ വ്യക്തമായ ചിത്രങ്ങളും മറ്റു വിവരങ്ങളും ലഭിക്കുകയുള്ളു. എന്നാല്‍ വിക്രം ലാന്‍ഡറിന്റെ സ്ഥാനം കണ്ടെത്താനായത് ഈ പ്രവര്‍ത്തനങ്ങളെ സഹായിക്കുമെന്നാണ് പ്രതീക്ഷ. 14 ദിവസം ആശയവിനിമയം തിരിച്ച് പിടിക്കാനുള്ള ശ്രമം തുടരുമെന്ന് ഇസ്‌റോ അറിയിച്ചിരുന്നു. ശനിയാഴ്ച പുലര്‍ച്ചെ ചന്ദ്രോപരിതലത്തില്‍ നിന്ന് 2.1 കിലോമീറ്റര്‍ മാറിയാണ് വിക്രം ലാന്‍ഡറുമായുള്ള സിഗ്നല്‍ നഷ്ടപ്പെട്ടത്.