ചെറുതുരുത്തി: മത- വൈജ്ഞാനിക -സാമൂഹിക -സാംസ്‌കാരിക പ്രവര്‍ത്തനങ്ങള്‍ക്ക് കഴിഞ്ഞ 40 വര്‍ഷമായി നേതൃത്വം വഹിച്ചുകൊണ്ടിരിക്കുന്ന ചെറുതുരുത്തി നൂറുല്‍ ഹുദയില്‍ പട്ടിക്കാട് ജാമിഅ:നൂരിയ്യ അംഗീകാരത്തോടെ ഈ വര്‍ഷം ആരംഭിക്കുന്ന ജൂനിയര്‍ കോളജിന്റെയും ഹിഫല്‍ ഖുര്‍ആന്‍ കോളജിന്റെയും ഉദ്ഘാടനം നൂറുല്‍ ഹുദാ എഡ്യുക്കേഷന്‍ സെന്റര്‍ പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങള്‍ നിര്‍വഹിച്ചു.

മുന്‍കാലങ്ങളില്‍ ഇതരസംസ്ഥാനങ്ങളെ മത ഭൗതിക വിദ്യാഭ്യാസത്തിന് വേണ്ടി ആശ്രയിച്ചിരുന്നുവെങ്കില്‍ ഇന്ന് ഇതരസംസ്ഥാനങ്ങള്‍ക്കു കൂടി മാതൃകയാവുന്ന തരത്തില്‍ കേരളത്തിലെ വിദ്യാഭ്യാസ സ്ഥാപനങ്ങള്‍ വളര്‍ന്നു കഴിഞ്ഞെന്ന് തങ്ങള്‍ അഭിപ്രായപ്പെട്ടു. നൂറുല്‍ ഹുദാ വര്‍ക്കിങ് പ്രസിഡന്റ് എം.പി കുഞ്ഞിക്കോയ തങ്ങള്‍ അധ്യക്ഷനായി. സമ്മേളനത്തില്‍ പട്ടിക്കാട് ജാമിഅ നൂരിയ്യ പ്രിന്‍സിപ്പാളും, സമസ്ത സെക്രട്ടറിയുമായ കെ.ആലിക്കുട്ടി മുസ്‌ലിയാര്‍ മുഖ്യാതിഥിയായിരുന്നു.

ഉമര്‍ ദാരിമി, അബ്ദുള്‍ സലാം ഹാജി, ഷഹീര്‍ ദേശമംഗലം, പി.വി മൊയ്തൂട്ടി ഹാജി, പി.എസ് കോയാമുഹാജി, നജീബ് ഹുദവി, പി.എ അബ്ദുള്‍ കരീം, ശുക്കൂര്‍ ഹുദവി, മുഹമ്മദ് സ്വാലിഹ് റഹ്മാനി തുടങ്ങിയവര്‍ സംസാരിച്ചു. നൂറുല്‍ ഹുദ എഡ്യുക്കേഷന്‍ സെന്റര്‍ ജനറല്‍ സെക്രട്ടറി ഹാജി.കെ.മമ്മദ് ഫൈസി സ്വാഗതവും, പി.എ അലി സാഹിബ് നന്ദിയും പറഞ്ഞു.