പവര്‍ ഗ്രിഡ് കോര്‍പ്പറേഷന്‍ അവസാനവട്ട പരിശോധന തുടങ്ങി

തൊടുപുഴ: തിരുനെല്‍വേലി - കൊച്ചി 400 കെ.വി ട്രാന്‍സ്മിഷന്‍ ലൈനില്‍ (പവര്‍ ഹൈവേ) പവര്‍ ഗ്രിഡ് കോര്‍പ്പറേഷന്‍ അവസാനവട്ട പരിശോധന തുടങ്ങി. ലൈനിലൂടെ വൈദ്യുതി കടത്തിവിട്ടുള്ള ട്രയല്‍ റണ്‍ അടക്കമാണ് നടത്തുന്നത്. പവര്‍ ഗ്രിഡ് കോര്‍പ്പറേഷന്റെ സബ് സ്റ്റേഷനിലേക്ക് ഘട്ടം ഘട്ടമായി വൈദ്യുതി പ്രവഹിപ്പിച്ചാണ് പരിശോധന നടത്തുന്നത്. തിരുനെല്‍വേലി മുതല്‍ ഇടമണ്‍ വരെയുള്ള 82 കി.മീറ്ററും അവിടുന്ന് കൊച്ചിവരെയുള്ള 142 കി.മീറ്ററും വിശദമായി പരിശോധിക്കും. പരിശോധനയും ട്രയല്‍ റണ്ണും വിജയകരമായി പൂര്‍ത്തിയായാല്‍ അടുത്തയാഴ്ചയോടെ ലൈന്‍ കെ.എസ്.ഇ.ബിക്ക് കൈമാറാനാകുമെന്നാണ് പ്രതീക്ഷ. കെ.എസ്.ഇ.ബി കൊമേഴ്‌സ്യല്‍ വിഭാഗവും സ്റ്റേറ്റ് ലോഡ് ഡെസ്പാച്ച് സെന്ററും തുടര്‍ നടപടികള്‍ തീരുമാനിക്കും.
സംസ്ഥാനത്തിന്റെ വൈദ്യുതി പ്രതിസന്ധിക്ക് ഒരു പരിധിവരെ പരിഹാരം കാണാന്‍ ഉതകുന്ന തിരുനെല്‍വേലി - കൊച്ചി 400 കെ.വി ട്രാന്‍സ്മിഷന്‍ ലൈന്‍ 1,150 കോടി ചെലവഴിച്ചാണ് പവര്‍ ഗ്രിഡ് കോര്‍പ്പറേഷന്‍ പൂര്‍ത്തീകരിച്ചത്. ടവര്‍ നിര്‍മാണത്തിനായി ഏറ്റെടുത്ത സ്ഥലത്തിന്റെ 85 ശതമാനം നഷ്ടപരിഹാരം പവര്‍ ഗ്രിഡ് കോര്‍പ്പറേഷനാണ് നല്‍കിയത്. ബാക്കിത്തുക സംസ്ഥാന സര്‍ക്കാരും കെ.എസ്.ഇ.ബിയും ചേര്‍ന്ന് നല്‍കി. ടവറിനായി ഏറ്റെടുത്ത സ്ഥലം ഉപയോഗിക്കാന്‍ കഴിയില്ലെങ്കിലും ലൈന്‍ കടന്നുപോകുന്ന സ്ഥലങ്ങള്‍ ഉടമസ്ഥര്‍ക്ക് കൈകാര്യം ചെയ്യാം.
2008 ലാണ് പദ്ധതിയുടെ ആദ്യഘട്ട പണികള്‍ തുടങ്ങിയത്. തിരുനെല്‍വേലിയില്‍നിന്ന് കൊല്ലം ജില്ലയിലെ ഇടമണ്‍ വരെയുള്ള ഭാഗം 2011 ല്‍ പൂര്‍ത്തീകരിച്ചു. ഭൂമിയേറ്റെടുക്കലുമായി ബന്ധപ്പെട്ട് സംസ്ഥാനത്ത് പ്രതിഷേധം ശക്തമായതോടെ പണി നിലച്ചു. കോട്ടയം, പത്തനംതിട്ട ജില്ലകള്‍ കേന്ദ്രീകരിച്ച് പദ്ധതിക്കെതിരേ വന്‍ പ്രക്ഷോഭം നടന്നിരുന്നു. എന്നാല്‍, നഷ്ടപരിഹാര പാക്കേജ് ആകര്‍ഷണീയമാക്കിയതോടെ പ്രതിഷേധം കെട്ടടങ്ങുകയായിരുന്നു. തുടര്‍ന്ന് 2017 മാര്‍ച്ചില്‍ പണികള്‍ പുനരാരംഭിച്ചു. കഴിഞ്ഞ ഡിസംബറില്‍ പദ്ധതിയുടെ നിര്‍മാണം 99 ശതമാനവും പൂര്‍ത്തിയായിരുന്നു. എറണാകുളത്തെ വജ്ര വ്യാപാരിയുടെ ഉടമസ്ഥതയിലുള്ള സ്ഥലത്തെ 644 മീറ്റര്‍ ലൈനുമായി ബന്ധപ്പെട്ട തര്‍ക്കത്തില്‍ കുരുങ്ങി നേരത്തെ പവര്‍ ഹൈവേ അനിശ്ചിതത്വത്തിലായിരുന്നു.