നെടുമ്പാശേരി: അനധികൃതമായി കടത്താന്‍ ശ്രമിച്ച 35 ലക്ഷം രൂപയോളം വിലവരുന്ന സ്വര്‍ണ മിശ്രിതം നെടുമ്പാശേരി വിമാനത്താവളത്തില്‍ എയര്‍ കസ്റ്റംസ് ഇന്റലിജന്‍സ് വിഭാഗം പിടികൂടി. ഇന്നലെ രാവിലെ ഷാര്‍ജയില്‍ നിന്നെത്തിയ യാത്രക്കാരനില്‍ നിന്നാണ് സ്വര്‍ണം പിടികൂടിയത്.
നാല് പായ്ക്കറ്റുകളിലാക്കിയ സ്വര്‍ണ മിശ്രിതം കാലിലെ സോക്‌സിനകത്താണ് ഒളിപ്പിച്ചിരുന്നത്. ഓരോ കാലിലും രണ്ട് പായ്ക്കറ്റുകള്‍ വീതമാണ് ഉണ്ടായിരുന്നത്. 1.400 കിലോഗ്രാം സ്വര്‍ണ മിശ്രിതമാണ് പിടിച്ചെടുത്തത്. ഇതില്‍ നിന്നും 35 ലക്ഷം രൂപയോളം വില വരുന്ന സ്വര്‍ണം വേര്‍തിരിച്ചെടുക്കാനാകും.
കോഴിക്കോട് കൊടുവള്ളി സ്വദേശിയാണ് കസ്റ്റഡിയിലായിരിക്കുന്നത്. ജോലി നഷ്ടപ്പെട്ട് നാട്ടിലേക്ക് വരികയായിരുന്ന ഇയാളെ കാരിയറായി ഉപയോഗപ്പെടുത്തുകയായിരുന്നുവെന്നാണ് ചൊദ്യം ചെയ്യലില്‍ നിന്നും വ്യക്തമായത്. കൊടുവള്ളി കേന്ദ്രീകരിച്ചുള്ള സ്വര്‍ണക്കടത്ത് സംഘമാണ് ഇതിന് പിന്നിലെന്നാണ് കസ്റ്റംസ് സംശയിക്കുന്നത്.