നിലമ്പൂര്‍: വധശ്രമത്തിനു പൊലിസ് പിടിയിലായ ആള്‍ ചോദ്യം ചെയ്യലില്‍ ലൈംഗിക പീഡനക്കേസിലും പ്രതിയാണെന്ന് തെളിഞ്ഞു. നിലമ്പൂര്‍ വെളിയംതോട് മാങ്ങാട്ടുപറമ്പില്‍ സെയ്ഫുദ്ദീന്‍ (35) ആണ് പൊലിസ് പിടിയിലായത്. ഈ മാസം അഞ്ചിന് രാത്രി 11.45 ഓടെ ഗ്രീന്‍ ആര്‍ട്ട് ഓഡിറ്റോറിയത്തിനു സമീപം ചുങ്കത്തറ മണലി സ്വദേശി ഹംസയെ കുത്തിപ്പരുക്കേല്‍പ്പിച്ച കേസിലാണ് ഇയാളെ ശനിയാഴ്ച നിലമ്പൂര്‍ പൊലിസ് പിടികൂടിയത്.
ഹംസ ഗുരുതര പരുക്കുകളോടെ കോഴിക്കോട് മെഡിക്കല്‍ കോളജാശുപത്രിയില്‍ ചികിത്സയിലാണ്. പ്രതിയെ ചോദ്യം ചെയ്തതോടെയാണ് ആറിന് പുലര്‍ച്ചെ മൂന്നോടെ പൂക്കോട്ടുംപാടം മാമ്പൊയിലില്‍ വീട്ടില്‍ അതിക്രമിച്ചു കയറി വീട്ടമ്മയെ പീഡിപ്പിച്ച കേസിലും ഇയാള്‍ ഉള്‍പ്പെട്ടതായറിയുന്നത്.
സംഭവത്തില്‍ നിലമ്പൂര്‍ സി.ഐക്ക് പരാതി നല്‍കിയിരുന്നു. ഇതിനു പുറമെ ഭാര്യയെ മര്‍ദിച്ച കേസിലും ഇയാള്‍ക്കെതിരെ വധശ്രമത്തിനു കേസെടുത്തിട്ടുണ്ട്. 2015 നവംബറില്‍ കഞ്ചാവു കേസില്‍ പിടിയിലായപ്പോള്‍ നിലമ്പൂര്‍ പൊലിസ് സ്‌റ്റേഷനില്‍ അതിക്രമം കാട്ടിയതിനും ഇയാള്‍ക്കെതിരെ നിലവില്‍ കേസുണ്ട്. നിലമ്പൂര്‍ സി.ഐ കെ.എം ദേവസ്യയുടെ നേതൃത്വത്തില്‍ എസ്.ഐ പ്രദീപ്, എ.എസ്.ഐ രാമചന്ദ്രന്‍, സി.പി.ഒമാരായ കെ.നിജേഷ്, അജീഷ്, പി. റഹിയാനത്ത് എന്നിവരടങ്ങുന്ന  സംഘമാണ് പ്രതിയെ അറസ്റ്റുചെയ്തത്. നിലമ്പൂര്‍ കോടതി റിമാന്‍ഡ് ചെയ്തു.